MFA mewn Hyfforddi Llais, Lleferydd a Thestun

Hyfforddi yn un o gonservatoires gorau’r DU
Ystyrir Coleg Brenhinol Cerdd a Drama Cymru yn un o’r lleoedd gorau i astudio cerddoriaeth a drama yn y DU. Mae ein MFA mewn Hyfforddi Llais, Lleferydd a Thestun yn cynnig hyfforddiant o’r radd flaenaf a phrofiad ymarferol mewn man creadigol a chydweithredol i’ch paratoi ar gyfer gofynion gyrfa hyfforddi.

Addysgu rhagorol gan arbenigwyr yn y diwydiant
Byddwch yn cael eich arwain gan rai o’r hyfforddwyr llais proffesiynol mwyaf blaenllaw sy’n gweithio yn y diwydiant heddiw, gan roi’r hyder i chi bod eich addysg yn cyd-fynd â’r arfer gorau cyfredol. 

Hyfforddiant a chefnogaeth bersonol 
Byddwch yn un o ddim ond pedwar myfyriwr ar eich cwrs, gan roi lefel uchel o gefnogaeth i chi gan eich tiwtoriaid, a’r lle a’r rhyddid i wthio ffiniau eich creadigrwydd mewn amgylchedd diogel a chroesawgar. 

Cysylltiadau sefydledig â rhai o sefydliadau celfyddydau a theatr gorau’r DU 
Mae gennym bartneriaethau cryf â sefydliadau celfyddydau blaenllaw ledled Cymru, megis Theatr y Sherman a Theatr Clwyd, a rhai sydd ymhellach i ffwrdd, gan gynnwys y Royal Shakespeare Company a’r National Theatre. 

Lleoliadau gwaith ochr yn ochr â gweithwyr proffesiynol y diwydiant
Cewch gyfle i gymryd rhan mewn lleoliadau mewnol ac allanol, gan ganiatáu i chi roi ar waith yr hyn yr ydych wedi’i ddysgu o dan fentoriaeth gweithwyr neu dimau proffesiynol profiadol. Mae enghreifftiau’n cynnwys gweithredu fel hyfforddwr llais gyda rhai o brif theatrau Cymru, megis Theatr y Sherman neu Theatr Clwyd, neu ddarparu cefnogaeth ar gyfer tafodiaith ar gynhyrchiad mewnol gan Gwmni Richard Burton. 

Dull cydweithredol heb ei debyg
Ni fyddwch yn hyfforddi ar eich pen eich hun y tu ôl i sgrin eich gliniadur. Byddwch yn dysgu trwy weithio’n agos ag ymarferwyr creadigol eraill, megis cyfarwyddwyr symud, cyfarwyddwyr ac awduron, i’ch helpu i berffeithio’ch crefft - dull cydweithredol sy’n gwneud ein MFA yn gwbl wahanol i gyrsiau eraill o’r math hwn.

Dosbarthiadau meistr gydag artistiaid creadigol nodedig
Byddwch yn cymryd rhan yn rheolaidd mewn dosbarthiadau meistr gydag ymarferwyr nodedig a fydd yn rhannu eu gwaith ac yn cynnig mewnwelediad i chi i’r byd proffesiynol. Mae’r arbenigwyr hyn yn dod o bob rhan o’r diwydiant, o hyfforddwyr llais clodwiw i gynhyrchwyr a chwmnïau theatr sy’n edrych i gyflogi hyfforddwyr yn rheolaidd.

Byw ym mhrifddinas Cymru
Bydd eich hyfforddiant yn digwydd yng Nghaerdydd, prifddinas Cymru, dinas gyfeillgar a chroesawgar gyda chymuned greadigol lewyrchus. Byddwch yn canfod llawer o gyfleoedd i gymryd rhan mewn prosiectau allanol, cydweithio ag artistiaid lleol ac adeiladu eich rhwydwaith o gysylltiadau creadigol - sy’n hanfodol ar gyfer gyrfa lawrydd lwyddiannus. 

Astudio mewn amgylchedd canolfan gelfyddydau fywiog
Bob blwyddyn bydd artistiaid a grwpiau byd-enwog yn ymweld â’n campws fel rhan o’n rhaglen perfformiadau cyhoeddus rhyngwladol gydnabyddedig. Rydym yn eich annog i fynychu cymaint o’r digwyddiadau hyn â phosibl, gyda phob un ar gael i chi am ddim neu gyda disgownt. 

• Drwy gydol eich cwrs, byddwch yn cymryd rhan mewn amrywiaeth o gyfleoedd hyfforddi – ar gynyrchiadau ac yn y stiwdio llais – gan roi ystod eang o brofiad ymarferol i chi a fydd yn eich gwneud yn arbennig ar ôl graddio.
• Mae’r cyfleoedd hyn yn cynnwys hyfforddi perfformwyr yn y nifer o gynyrchiadau a lwyfannir bob blwyddyn gan Gwmni Richard Burton, cwmni theatr mewnol y Coleg. Bydd gweithwyr proffesiynol y diwydiant yn aml yn mynychu’r cynyrchiadau hyn, ac maent yn adlewyrchu arferion y byd go iawn, gan roi profiad amhrisiadwy i chi, a’ch paratoi ar gyfer gwaith ar ôl graddio.
• Mae cydweithio’n rhedeg drwy gydol eich cwrs. Byddwch yn gweithio ochr yn ochr â myfyrwyr MFA drama eraill, yn ogystal â’r rhai o wahanol adrannau ar draws y Coleg. Mae’r cydweithrediadau hyn yn cynnig mewnwelediad i gerddoriaeth a meysydd eraill byd y ddrama, tra hefyd yn rhoi’r cyfle i chi adeiladu partneriaethau creadigol a allai barhau ymhell ar ôl i chi raddio.

Mae ein tîm derbyniadau yn hapus i helpu gydag unrhyw gwestiynau am ofynion mynediad, cyfweliadau neu fywyd yn CBCDC. Anfonwch e-bost at admissions@rwcmd.ac.uk i ddechrau arni.

Ymunwch â chymuned o artistiaid angerddol a thalentog yng Ngholeg Brenhinol Cerdd a Drama Cymru. P’un a ydych chi’n paratoi ar gyfer gyrfa ym myd teledu a ffilm, neu am lunio dyfodol addysg drama, mae eich llwybr yn dechrau yma.