Cystadleuaeth gyntaf Gwobr y Gân Syr Bryn Terfel: Hyrwyddo creadigrwydd, dathlu Cymru a chefnogi perfformwyr sy’n dod i’r amlwg
Darllen mwy
Newyddion
Cyfarwyddwr Cynllunio ar gyfer Perfformio CBCDC yn ennill Gwobr Pin Aur Rhyngwladol am gyflawniad oes ym maes Cynllunio Llwyfan
Mae Sean Crowley, Cyfarwyddwr Drama a Phennaeth Cynllunio ar gyfer Perfformio yng Ngholeg Brenhinol Cerdd a Drama Cymru, wedi derbyn Gwobr Pin Aur nodedig am gyflawniad oes ym maes Cynllunio Llwyfan gan OISTAT yn arddangosfa World Stage Design 2025.
Mae Sean Crowley, Cyfarwyddwr Drama a Phennaeth Cynllunio ar gyfer Perfformio yng Ngholeg Brenhinol Cerdd a Drama Cymru, wedi derbyn Gwobr Pin Aur nodedig am gyflawniad oes ym maes Cynllunio Llwyfan gan OISTAT (Sefydliad Rhyngwladol Senograffwyr, Penseiri a Thechnegwyr Theatr) yn arddangosfa World Stage Design 2025, a gynhaliwyd eleni yn Sharjah.
Mae Sean, a ddathlodd 25 mlynedd yn ei swydd yn CBCDC y llynedd, yn arweinydd ym maes cynllunio theatr ym Mhrydain ac yn rhyngwladol.
Yn ystod y cyfnod hwn mae ei ffocws ar ‘hyfforddiant ysgol gelf’ mewn lleoliad conservatoire, a’i angerdd dros wneud cwrs Cynllunio y Coleg mor hygyrch â phosibl, gan annog pobl na fyddent fel arfer yn meddwl am astudio mewn conservatoire i wneud cais, wedi arwain at hanes eithriadol yn y Wobr Linbury nodedig am Gynllunio Llwyfan.
Yr unig wobr genedlaethol ar gyfer talentau cynllunio sy’n dod i’r amlwg yn y DU, mae bron i hanner y rheini sydd wedi cyrraedd y rownd derfynol yn saith mlynedd diwethaf Gwobr Linbury wedi astudio yn CBCDC.
‘Rydw i wrth fy modd yn derbyn y wobr hon.’ Mae’n gydnabyddiaeth ystyrlon o fy ymrwymiad hirsefydledig i OISTAT, dros bron i ugain mlynedd, i greu cyfleoedd i ymarferwyr a myfyrwyr ddod at ei gilydd, rhannu profiadau, a dathlu’r gwaith rydyn ni’n ei gynhyrchu.
Rydw i bob amser wedi cael ysbrydoliaeth o allu cynnig cyfle i’m myfyrwyr gymryd rhan mewn digwyddiadau rhyngwladol. Mae’r profiadau hyn nid yn unig yn cyfoethogi eu dysgu ond hefyd yn ein helpu i godi proffil yr adran gynllunio a’r Coleg, gan ehangu ein cymuned ryngwladol.
Mae’n anrhydedd fawr i mi gael fy enwebu gan gynllunwyr mor wych.’Sean CrowleyCyfarwyddwr Cynllunio ar gyfer Perfformio, CBCDC
Mae Sean wedi ymrwymo i feithrin cydweithio rhyngwladol, cyfnewid artistig, a datblygiad addysgol, fel y dangosir yn ei waith gydag OISTAT dros nifer o flynyddoedd, yn enwedig trwy ei ymgysylltiad parhaus yn y Comisiwn Addysg a’r Pwyllgor Gweithredol.
Yn 2013 roedd yn Gyfarwyddwr World Stage Design pan ddaeth y digwyddiad i Goleg Brenhinol Cerdd a Drama Cymru yng Nghaerdydd. O dan ei arweiniad daeth WSD 2013 nid yn unig yn arddangosfa ragorol, ond hefyd yn fan cyfarfod hollbwysig ar gyfer deialog, arloesedd, a chyfnewid rhyngddisgyblaethol ymhlith gweithwyr proffesiynol theatr, addysgwyr, a myfyrwyr.
Yn fwy diweddar, mae ei waith gydag OISTAT wedi cynnwys cydlynu rhaglen Gwirfoddolwyr Rhyngwladol WSD 2025, gan gyfuno arweinyddiaeth, effaith addysgol, a rheoli prosiectau rhyngwladol.
‘Mae Sean yn ffigur allweddol i fyfyrwyr a chynllunwyr ifanc ledled y byd. Trwy ei haelioni, ei wybodaeth ddofn, a’i ysbryd cydweithredol, mae’n ysbrydoli ac yn symud gweithwyr proffesiynol ac addysgwyr ar draws ffiniau, gan helpu ymarferwyr sy’n dod i’r amlwg i ddilyn cyfleoedd astudio a gyrfa pellach.
Mae llawer ohonynt yn parhau i ddilyn a chefnogi ei waith trwy wirfoddoli yn y digwyddiadau y mae’n eu harwain. Mae ymroddiad a dylanwad rhyfeddol Sean Crowley yn ei wneud yn enillydd gwirioneddol haeddiannol.’Gwobr OISTAT
Nodiadau i Olygyddion
World Stage Design (WSD) yw’r arddangosfa gyntaf, a’r unig un, sy’n canolbwyntio ar gynllunwyr i arddangos a dathlu cynllunio ar gyfer perfformio gan gynllunwyr unigol. Wedi’i chynnal bob pedair blynedd, mae WSD bellach wedi teithio i bum dinas: Toronto, Seoul, Caerdydd, Taipei, a Calgary. Cynhaliwyd chweched arddangosfa WSD yn Sharjah, Emiradau Arabaidd Unedig.
Gwobr Linbury
Dyfernir Gwobr Linbury fawreddog, unig wobr genedlaethol y DU ar gyfer talent cynllunio sy’n dod i’r amlwg, bob dwy flynedd ac mae’n cefnogi cynllunwyr i ddatblygu gyrfa gynaliadwy yn y diwydiant creadigol.
Mae cynllunwyr CBCDC sy’n enillwyr Gwobr Linbury yn ymgorffori ysbryd hyfforddiant ar draws y Coleg, gan gofleidio cydweithio, a dull di-ofn o fynd â’u celf i fannau newydd, gan archwilio’r lle a’i berthynas â chynulleidfa er mwyn herio ac ymgysylltu.
