Yr Hen Lyfrgell

Rydyn ni ar waith â thrawsnewid Hen Lyfrgell boblogaidd Caerdydd yn ganolfan ddiwylliannol ac addysgol newydd a deinamig yng nghanol y ddinas. Diolch i rodd waddol gwerth £2 filiwn gan Sefydliad Foyle, ynghyd â chymorth gan gronfa Trawsnewid Trefi Llywodraeth Cymru a chronfa fenthyciadau Digarbon sy’n cael ei chynnal gan Salix, mae'r Coleg bellach wedi sicrhau'r holl gyllid ar gyfer Cam Un y gwaith ailddatblygu.

Gwybodaeth am y gofod

Mae’r cynlluniau uchelgeisiol a gymeradwywyd yn addo meithrin yr ystod fwyaf amrywiol o ddoniau a chyfuno arloesedd gyda threftadaeth ddiwylliannol Cymru. Mae’r cynlluniau ar gyfer y dyfodol yn cynnwys creu mannau cerddoriaeth a pherfformio, hyrwyddo a diogelu’r Gymraeg a rhoi ‘lolfa yn y ddinas’ ar gyfer y cyhoedd.

Gwaddol Sefydliad Foyle

Mae haelioni Sefydliad Foyle wedi chwarae rhan hanfodol wrth wneud y trawsnewidiad hwn yn bosibl. Mewn cydnabyddiaeth o'u rhodd waddol gwerth £2 filiwn, bydd tair ardal gyhoeddus allweddol a fydd wedi’u hailddatblygu yn yr Hen Lyfrgell yn dwyn eu henw:

Grisiau Foyle – grisiau llydan, hygyrch sy'n arwain o'r Aes i'r adeilad.
Cyntedd Foyle – lle newydd croesawgar yn y fynedfa ar gyfer gweithgareddau’r gymuned a’r myfyrwyr.
Llwyfannau Foyle – llwyfannau awyr agored ar gyfer perfformiadau cyhoeddus a digwyddiadau creadigol am ddim.

Mae'r grant gwaddol i Goleg Brenhinol Cerdd a Drama Cymru yn dod â Hen Lyfrgell Caerdydd yn ôl i ddefnydd cyhoeddus er mwyn darparu cyfleusterau ychwanegol mawr eu hangen ar gyfer conservatoire cenedlaethol Cymru ac yn creu ased cymunedol gwerthfawr yng nghanol Caerdydd.
David HallPrif Weithredwr, Sefydliad Foyle

Adeiladu Cartref Newydd i'r Celfyddydau

Bydd Cam Un yn cwblhau yn Haf 2026 ac yn cynnwys:

Gwelliannau mawr i’r fynedfa gyhoeddus, gan greu grisiau a rampiau agored yn lle’r porth gwydr presennol.
Cyntedd amlbwrpas newydd ar gyfer arddangosfeydd a pherfformiadau cyhoeddus.
Creu lleoliad 250 sedd, Stiwdio Syr Howard Stringer, lle caiff perfformiadau gan fyfyrwyr CBCDC ac artistiaid gwadd eu cynnal.
Gwelliannau o ran cynaliadwyedd, gan gynnwys gwydr sy’n lleihau carbon ac adfer y ffenestri gwreiddiol.

Bydd y gwaith hwn yn effeithio ar ardaloedd y Coleg o’r adeilad yn unig. Bydd Menter Caerdydd ac Amgueddfa Caerdydd yn aros ar agor trwy gydol y gwaith adeiladu, gyda mynediad trwy Stryd y Drindod.

'Fel Conservatoire Cenedlaethol Cymru rydym eisiau ysgogi chwilfrydedd a meithrin yr ystod fwyaf amrywiol o ddoniau, gan gyfuno arloesedd gyda thraddodiad diwylliannol a threftadaeth Cymru.

Mae’n gyffrous iawn i gael y cyfle hwn i ddod â rhyfeddod y Coleg i galon prifddinas Cymru, a gweithio ochr yn ochr â phobl leol, artistiaid a doniau creadigol i wireddu ein cynlluniau. Mae rhoi bywyd newydd i’r Hen Lyfrgell yn rhan o addewid CBCDC i Gymru, ei phrifddinas ac i genedlaethau’r dyfodol.

Dros y blynyddoedd nesaf ein nod fydd cynnig ystod o weithgareddau llawn ysbrydoliaeth a phrofiadau creadigol yn yr Hen Lyfrgell a byddem wrth ein bodd yn archwilio syniadau ar gyfer prosiectau ar y cyd yn y dyfodol gyda sefydliadau ac artistiaid sydd â diddordeb mewn rhannu’r cyfle hwn. Rydym hefyd yn edrych ymlaen at weithio gyda Chyngor Caerdydd a dychwelyd yr adeilad i’w wreiddiau, sef addysg a chymuned yn Ninas Cerddoriaeth.'
Athro Helena GauntPrifathro CBCDC