Pwy ydym ni

Caiff ein myfyrwyr eu trochi mewn amgylchedd diwydiant byw o’r eiliad y maent yn cyrraedd gan ymgysylltu â’r cyhoedd yn eu gwaith ar bob cyfle, a’u cefnogi fwyfwy i gyd-greu cyfnodau preswyl mewn lleoliadau cymunedol amrywiol. Gyda rhai o leoliadau mwyaf clodfawr Cymru, rydym yn gweithredu canolfan gelfyddydau ddeinamig ac mae ein rhaglen berfformio o weithwyr proffesiynol o’r radd flaenaf yn rhan annatod o hyfforddiant y myfyrwyr.

Yn ogystal â rhaglen amrywiol o berfformiadau, sy’n cynnwys myfyrwyr o bob disgyblaeth, mae’r Coleg yn denu artistiaid rhyngwladol blaenllaw, gan roi cyfle i fyfyrwyr ddysgu gan rai o berfformwyr mwyaf adnabyddus y byd. Wedi’n hysbrydoli gan bosibiliadau perfformio ac amrywiaeth greadigol, rydym yn hyrwyddo cydweithredu ac yn grymuso rhagoriaeth yn ei holl ffurfiau. 

Amrywiaeth Greadigol

Mae calendr digwyddiadau’r Coleg yn llawn o dros 500 o berfformiadau cyhoeddus bob blwyddyn, yn cynnwys cyngherddau cerddorfaol, datganiadau, drama, opera a theatr gerdd. Mae amrywiaeth creadigol y Coleg yn sicrhau amgylchedd ysgogol a phrofiad eang i fyfyrwyr pob disgyblaeth.

Cysylltiadau â'r diwydiant

Mae gan ein hathrawon ymroddedig gyfoeth o brofiad proffesiynol a phrofiad yn y diwydiant ac mae’r Coleg yn cydweithio gyda nifer o sefydliadau celfyddydol uchel eu proffil, yn cynnwys  BBC, Opera Cenedlaethol Cymru, artistiaid a chyfarwyddwyr gwadd, er mwyn sicrhau bod natur alwedigaethol unigryw ein rhaglen hyfforddiant yn adlewyrchu arfer ac amodau presennol y byd proffesiynol.

Wedi ein hysbrydoli gan bosibiliadau perfformio ac amrywiaeth greadigol, rydym yn hybu'r arfer o gydweithio ac yn grymuso rhagoriaeth yn ei holl ffurfiau. Mae angerdd a chrefft yn cydblethu â phrofiad a chwarae, gan ddyrchafu, pryfocio, gwthio a thrawsnewid.

Mae ein fframwaith strategol yn cyflwyno cyfeiriad a blaenoriaethau hirdymor y Coleg ar gyfer y deng mlynedd nesaf.

Caiff ei arwain gan ein gweledigaeth, ein cenhadaeth a'n pwrpas, a'i ategu gan ein gwerthoedd cyffredin. Ein gweledigaeth yw newid bywydau, a thrawsnewid a chysylltu cymunedau drwy'r celfyddydau.

Wedi'i ddatblygu drwy ymgynghori â staff, myfyrwyr, llywodraethwyr a phartneriaid, mae'r fframwaith yn adlewyrchu'r gwerthoedd, yr uchelgeisiau a'r pwrpas cyffredin sy'n llunio ein cymuned a'n dyfodol.

Mae wedi'i adeiladu o amgylch tair thema strategol, gydag amrywiaeth, cynhwysiant ac ymdeimlad o berthyn wedi'u plethu drwy'r cyfan.

• Creu gwerth i Gymru
• Darparu hyfforddiant o'r radd flaenaf
• Cryfhau cynaliadwyedd

Gyda'i gilydd, mae'r themâu hyn yn darparu sylfaen glir ar gyfer sut rydym am symud ymlaen gyda'n gilydd fel sefydliad i gyflawni ein huchelgeisiau a chryfhau ein heffaith ledled Cymru, y Deyrnas Unedig ac yn rhyngwladol.

Tra bod y fframwaith yn gosod ein cyfeiriad hirdymor, caiff ei gyflawniad ei lywio drwy ymgynghori parhaus, cynllunio blynyddol, cynlluniau manwl a chydweithio ar draws y Coleg a'r diwydiannau ehangach.

Ein gwerthoedd

• Arbenigol a chynhwysol
• Cyfoes a chydweithredol
• Dyfeisgar a chyfrifol

Gyda'n gilydd, rydym yma dros y celfyddydau, Cymru a'r dyfodol.