Dathlu’r celfyddydau, cyfoethogi bywydau a chreu gwerth i Gymru - Crynodeb 2026

Rhaid i ni ddechrau drwy longyfarch ein graddedigion diweddaraf, a ddathlodd eu cyflawniadau rhyfeddol yn ein seremonïau graddio’r mis hwn. Wrth iddynt ein gadael ni am yrfaoedd ar draws y diwydiannau creadigol, rydym yn edrych ymlaen yn fawr i weld beth ddaw nesaf iddynt.

Gwnaethom hefyd groesawu ein Cymrodyr Anrhydeddus newydd, tri ohonynt yn raddedigion rhagorol y mae eu gyrfaoedd yn ymgorffori’r gwerthoedd y mae ein hyfforddiant yn eu meithrin yn ein myfyrwyr: Pennaeth Cerddoriaeth Glasurol yng Nghanolfan Southbank Llundain, Toks Dada, y cynllunydd setiau a gwisgoedd gwobrwyedig Hayley Grindle, a’r actores wobrwyedig Anjana Vasan.

Mae eu cyflawniadau’n dangos dylanwad graddedigion CBCDC ar draws y diwydiannau creadigol ac ar lwyfannau rhyngwladol.

Mae’r Coleg yn darparu llif talent hollbwysig i ecosystem celfyddydau Cymru, ac mae ein graddedigion yn bwydo ac yn cyfoethogi y celfyddydau yng Nghymru, gan gael effaith ar draws y sector creadigol.

Llongyfarchiadau i’r cynllunydd goleuo Katy Morrison, cyd-sylfaenydd a chyfansoddwr Gagglebabble Lucy Rivers, yr awduron-berfformwyr Nia Gandhi, Teleri Hughes, y cynllunwyr Cory Shipp a Sophie Thomas a’r awdur/actor Katie Elin-Salt, sydd i gyd wedi cael eu dewis ar gyfer rhaglenni datblygu artistiaid ein partner artistig Theatr Clwyd. Mae mentrau Stiwdio Clwyd wedi’u cynllunio i gefnogi’r genhedlaeth nesaf o wneuthurwyr theatr yng Nghymru wrth iddynt ehangu eu hymarfer.

O gynyrchiadau teledu mawr i wyliau celfyddydau cenedlaethol, mae talent CBCDC yn parhau i ddathlu a hyrwyddo diwylliant Cymru.

Mae cyfres ‘The Other Bennet Sister,’ sydd bellach i’w gweld ar BBC iPlayer, wedi bod yn un o’r uchafbwyntiau ar y teledu eleni, gan blesio’r beirniaid a’r cyhoedd.

Mae’n arddangos talentau graddedigion Cynllunio ar gyfer Perfformio CBCDC, gyda’r cynllunydd gwisgoedd Sian Jenkins, ochr yn ochr â thîm sy’n cynnwys graddedigion eraill CBCDC, yn dod â’r byd yn fyw trwy’r gynau gwasg-ymerodraeth, bonedi a rhubanau.

Gallwch weld gwisgoedd y gyfres, a gynhyrchwyd gan Bad Wolf, yng Ngerddi Dyffryn ar gyrion Caerdydd, lle byddant yn cael eu harddangos tan fis Awst.

Mae’r Eisteddfod Genedlaethol yn dathlu 850 mlynedd o lwyfannu ‘cyfoeth ac amrywiaeth celfyddydau ac artistiaid Cymru.’ Ac yn ôl yr arfer mae ein graddedigion, staff a myfyrwyr yn dod â’u sgiliau i bob elfen o’r ŵyl:

Gweithiodd ein myfyrwyr Celfyddydau Golygfeydd gyda grwpiau cymunedol ledled De a Gorllewin Cymru, gan ddefnyddio eu sgiliau crefft arbenigol i greu amrywiaeth o addurniadau ar gyfer y dathliad pwysig hwn.

Gan ddod ag ysgolion lleol, hynafiaid Windrush a grwpiau Sgowtiaid ynghyd, dathlwyd diwylliant, treftadaeth a chreadigrwydd Cymru trwy gydweithio cymunedol.

Mae’r cynllunydd graddedig Cordelia Ashwell, a’i chwmni Decordia, yn gwneud gwaith cynllunio ar gyfer yr eisteddfod, tra bydd myfyrwyr, graddedigion a staff y Coleg yn perfformio yn yr ŵyl.

Maent yn cynnwys seren cyfres Y Llais Liam J Edwards, sydd newydd ryddhau anthem bwerus newydd yn Gymraeg, gweithdai canu corawl, a Chaneuon a Barddoniaeth Sir Benfro dan arweiniad y tenor Rhys Archer.

Fel y gwnaeth ein Cyfarwyddwr Cerddoriaeth Tim Rhys-Evans atgoffa’r gynulleidfa wrth siarad ag Aled Jones ar Songs of Praise y BBC, mae enw da Cymru fel Gwlad y Gân wedi’i adeiladu ar genedlaethau o bobl yn canu gyda’i gilydd. Ac yn ysbryd ein Nawddsant, awgrymodd ‘gwnewch y pethau bychain’. Un o’r pethau bach y gallwn ni i gyd ei wneud yw canu, sy’n rhywbeth syml ond mor bwerus.

Mae cefnogi a thyfu’r dreftadaeth gerddorol honno’n rhan hollbwysig o rôl y Coleg fel conservatoire cenedlaethol Cymru.

Mae rhoi profiad byd go iawn i fyfyrwyr yn ganolog i’n hyfforddiant. Rydym yn gweithio mewn partneriaeth agos ag Opera Cenedlaethol Cymru a Cherddorfa Genedlaethol Gymreig y BBC i gefnogi dilyniant i waith proffesiynol, gyda llawer o raddedigion CBCDC yn mynd ymlaen i weithio ar draws y sector opera ehangach yn y DU ac yn rhyngwladol.

Mae’r graddedig chwythbrennau a thiwtor yn y Coleg, Will White, yn un o’r rhai diweddaraf i ymuno â BBC NOW yn sedd y Prif Glarinét rhif 2 a Phrif Glarinét Eb. 

Ar draws meysydd theatr a digwyddiadau byw, mae graddedigion yn gweithio ar rai o gynyrchiadau mwyaf y byd.

Yr haf hwn, dychwelodd rhai o’n graddedigion i Gaerdydd gyda thaith ‘Circus Live’ Take That - un o’r cynyrchiadau byw mwyaf arloesol yn hanes cerddoriaeth bop y DU - a ddaeth i Gaerdydd yn wreiddiol yn 2009, pan oedd gweithio ar daith stadiwm theatrig mor enfawr yn ddim ond breuddwyd i’r myfyriwr Rheoli Llwyfan ifanc Kevin Smith.

Y tro hwn, roedd yn ymuno â chyd-raddedigion dros nifer o flynyddoedd fel rhan o dîm delfrydol o dros 250 o bobl yn gweithio gyda’i gilydd i gyflwyno sioe ryfeddol: gan weithio fel Goruchwylydd Cynhyrchu Rheoli Llwyfan ochr yn ochr â’r graddedig diweddar Sophie Thomas yn y tîm Rheoli Llwyfan, y cynllunydd goleuo oedd y graddedig a’r Cymrawd Tim Routledge, a’r Goruchwylydd Cynhyrchu/Rheolwr Cynhyrchu llawrydd a’r darlithydd gwadd Helen Smith oedd Galwr y Sioe.

Efallai yn bwysicaf oll, mae ein graddedigion yn parhau i ddangos sut mae eu hyfforddiant yn trosi’n yrfaoedd llwyddiannus ac amrywiol, o’r West End i deithiau rhyngwladol, o gyfresi treftadaeth teledu i ddylanwadu ar gynyrchiadau Theatr Gerddorol.

Nid yw Kirsty Gardiner wedi graddio eto o’i gradd Rheolaeth yn y Celfyddydau, ond cyfnewidiodd ei chyfnod ar leoliad dros yr haf am swydd newydd fel Dirprwy Reolwr Cwmni ar gyfer ‘Hercules’ Disney: The Musical yn y West End.

Rhoddodd ei hyfforddiant yr hyder, y sgiliau a’r wybodaeth iddi ailymuno â byd gwaith, ond yn ‘ei man gyrfa delfrydol’. Ac mewn enghraifft o raddedigion CBCDC yn cefnogi’r genhedlaeth nesaf, roedd ei lleoliad cyntaf yng Nghanolfan Mileniwm Cymru dan fentoriaeth cyn-fyfyriwr MA Rheolaeth yn y Celfyddydau arall.

Ac mewn enghraifft arall o’r Coleg yn grymuso myfyrwyr i ddod o hyd i’r man gyrfa delfrydol: bum mlynedd yn ôl gwnaeth Jack Sampson gais ar gyfer ein cwrs MA Rheoli Llwyfan a Digwyddiadau gydag un nod penodol.

Roedd am weithio ym myd dawns, anrhydeddu etifeddiaeth ei deulu o ddawnswyr proffesiynol, a chael cyfleoedd i deithio yn ei waith.

‘Fe ddes i CBCDC gyda gwybodaeth sylfaenol am reoli llwyfan. Ar ôl y flwyddyn gyntaf o hyfforddiant roedd gen i’r hyder i weithio ar gynyrchiadau ar raddfa fawr ar draws elfennau llwyfan, goleuo a sain. Dyma lle dechreuodd fy ngyrfa broffesiynol mewn rheoli llwyfan.’

Gan symud ymlaen i’r presennol, mae Jack newydd gwblhau ei drydedd daith ryngwladol fel Rheolwr Llwyfan ar gyfer Peaky Blinders - The Redemption of Thomas Shelby gan Rambert yn Beijing.

Nid yn unig y mae ein myfyrwyr yn perfformio mewn gweithiau newydd, maent hefyd yn cyfrannu at ei ddatblygiad wrth gydweithio â gweithwyr proffesiynol yn y diwydiant: y llynedd gweithiodd y fyfyrwraig Theatr Gerddorol Katie Louise Pritchard, ynghyd â’i chyd-fyfyrwyr, gyda’r cwmni cynhyrchu o’r Unol Daleithiau Hugo Six a’r tîm creadigol y tu ôl i’r sioe gerdd newydd Private Jones, gan gyflwyno eu gwaith ymchwil a datblygu i weithwyr proffesiynol yn y diwydiant.

A nawr mae Katie wedi cael ei chastio ochr yn ochr â Luke McCall, un arall o raddedigion CBCDC.

Mae’r Private Jones yn integreiddio iaith arwyddion, capsiynau byw a seinwedd Foley, gyda chast yn cynnwys perfformwyr byddar, trwm eu clyw a rhai sy’n clywed, gyda chefnogaeth tîm creadigol o Gymru yn bennaf. Mae’r cynhyrchiad hwn wedi ei ail-weithio gyda mewnbwn gan fyfyrwyr CBCDC i sicrhau bod y stori’n cael ei hadrodd yn ddilys, ar gyfer y cynhyrchiad yn Llundain y Nadolig hwn.

Mae ein graddedigion aml-offerynnol yn gwneud eu marc ym myd y theatr gerddorol: Thom Conroy, a berfformiodd yn y West End yn ‘The Great Gatsby’, mae Katie Mogford wedi gweithio gyda’r graddedig ac enwebai Gwobr Mercury James Mainwaring ar ‘Into the Woods’ yn South Bank Llundain, ac mae Caroline Richardson wedi teithio’r byd yn perfformio gyda P&O Cruises.

A gwisgodd Pedwarawd Vita, sy’n cynnwys chwaraewyr llinynnol ôl-radd presennol y Coleg, eu bonedi yn gynharach eleni wrth iddynt gael eu gwahodd gan ein partneriaid, a chynhyrchwyr y gyfres, Bad Wolf, i berfformio yn lansiad Llundain o The Other Bennet Sister.

Gwnaethant ddefnydd da o’u hyfforddiant mewn cerddoriaeth glasurol a chyfoes, gan symud rhwng chwarae cerddoriaeth a gyfansoddwyd yn arbennig ar gyfer y gyfres i repertoire arall.

Yn angerddol am waith allgymorth ac addysg, nhw yw’r Pedwarawd Preswyl arloesol yng Nghanolfan Gelfyddydau’r Eglwys Norwyaidd yng Nghaerdydd, yn gweithio gyda’r gymuned ac yn mynd i ysgolion lleol gyda’n pedwarawdau llinynnol preswyl, Pedwarawdau Carducci a Fibonacci.

Mae’r Pedwarawd wedi cael ei ddewis ar gyfer Canolfan Ragoriaeth Ensemble Trinity Laban yn Llundain o fis Medi ymlaen, i helpu i barhau â’i ddatblygiad fel pedwarawd.

Mae ein graddedigion actio yn parhau i greu argraff ar y llwyfan a’r sgrin, gyda gyrfaoedd yn mynd â nhw o Shakespeare’s Globe i Fydysawd Marvel.

Bydd ein hactorion yn aml yn gwneud eu hymddangosiadau proffesiynol cyntaf cyn graddio: mae’r actor blwyddyn olaf Busa Wickramasuriya wedi’i gastio fel Silvius yn ‘As You Like It’ yn Shakespeare’s Globe, ochr yn ochr â’r graddedigion Thomas Josling a Katherine Pearce, tra bod Matthew Doswell yn ymuno â throsglwyddiad West End cynhyrchiad clodwiw’r Old Vic o ‘Arcadia’ yn Theatr Duke of York.

Ar y sgrin, mae graddedigion a’n hartistiaid cyswllt yn parhau i’w gweld mewn rhai o gynyrchiadau mwyaf y byd teledu, o seren Silo ac Artist Cyswllt Anrhydeddus Alexandria Riley, i Tom Rhys Harries a fydd ar y sgrin fawr fel Clayface, ac mae Lauren Morais yn ymuno â bydysawd Marvel yn ‘VisionQuest’ Disney+.

Ymddiriedwyd un o rolau mwyaf eiconig ffuglen drosedd Brydeinig i’r graddedig actio Edward Bluemel, wedi iddo gael ei gastio gan y BBC fel Hercule Poirot ifanc. Mae’n rhaid i ni aros i weld a fydd y mwstásh enwog yn gwneud ymddangosiad, ond byddwn yn sicr yn gwylio. Mae mewn dwylo da gan mai Rebecca Durbin, a raddiodd gydag MA Actio o’r Coleg, fydd y Cynhyrchydd Gweithredol.

Blaenoriaeth allweddol ein strategaeth newydd yw ehangu mynediad at gyfleoedd creadigol a sicrhau y gall pobl dalentog o bob cefndir lwyddo.

Mae ysgoloriaethau yn parhau i chwarae rhan hollbwysig mewn agor llwybrau i hyfforddiant yn y celfyddydau. Eleni, derbyniodd myfyrwyr wobrau nodedig gan sefydliadau sy’n cynnwys Theatr New Earth a chynllun Bwrsariaeth Laurence Olivier, gan helpu i sicrhau nad yw rhwystrau ariannol yn atal pobl ifanc dalentog rhag dilyn gyrfaoedd yn y celfyddydau.

Mae’r actor blwyddyn olaf Ashleigh Lai wedi derbyn Bwrsariaeth Myfyriwr Drama Consellation Creatives 2026 New Earth, sydd â’r nod o annog a hyrwyddo mwy o gyfranogiad a chynrychiolaeth actorion o Ddwyrain a De-ddwyrain Asia ar y llwyfan a’r sgrin trwy gefnogi’r llwybr o fyfyriwr sy’n graddio i fod yn actor proffesiynol.

Yn ystod mis Mehefin, mis Balchder, enwyd Is-lywydd Undeb y Myfyrwyr Ash Penny yn un o’r rhai i’w gwylio ar Restr Pinc WalesOnline, sy’n cydnabod y bobl LHDT+ mwyaf dylanwadol yng Nghymru.

Fel myfyriwr trawsryweddol, mae Ash yn dod â’i brofiad ei hun i’w rôl fel Is-lywydd Undeb y Myfyrwyr dros Les a Chynhwysiant, gan gydnabod pa mor bwysig yw cael modelau rôl a gwelededd.

Yn ddiweddar curadodd a pherfformiodd ei sioe un-dyn Translucidity, yn canolbwyntio ar ei brofiad o drawsnewid, a’r hinsawdd wleidyddol ehangach.

P’un a yw ein graddedigion yn perfformio ar lwyfannau rhyngwladol, yn creu gwaith newydd, yn arwain sefydliadau diwylliannol neu’n ymgysylltu â chymunedau ledled Cymru, maen nhw’n mynd â themâu allweddol strategaeth newydd y Coleg gyda nhw, sef ein bod ni yma ar gyfer y celfyddydau, Cymru a’r dyfodol.