Ble Gall Cerddoriaeth Fynd â Chi?

Mae astudio cyfansoddi yn y Coleg yn mynd y tu hwnt i ysgrifennu ar gyfer cerddorfeydd a chorau. Er y byddwch yn dal i archwilio cerddoriaeth draddodiadol, nodiannol, byddwch hefyd yn archwilio bydoedd newydd cyffrous sain digidol a cherddoriaeth ar gyfer gemau - gan roi’r arfau i chi greu ar draws ystod eang o arddulliau a diwydiannau.

Ar hyn o bryd mae’r myfyriwr Jacob Owen yn treulio blwyddyn yn astudio dramor yn Japan, wedi’i ddenu yno gan gariad gydol oes at gerddoriaeth gemau fideo. ‘Mae cerddoriaeth gemau wedi dylanwadu ar fy ysgrifennu erioed,’ meddai, ‘felly roeddwn i eisiau mynd i’r man lle dechreuodd y cyfan.’

Mae ei daith yn Japan wedi cynnwys trochi ei hun yn yr iaith, y diwylliant, ac arddulliau newydd o addysgu.

‘Mae wedi dangos yn glir iawn y gwahanol ffyrdd o addysgu. Mae teithio i ochr arall y byd wedi rhoi ffordd o feddwl newydd i mi. Gallaf werthfawrogi’r ddwy ffordd ac rwy’n dod o hyd i’r hyn rwy’n ei hoffi rhywle rhwng y ddau ac yn dilyn fy mreuddwydion fy hun.’

Mae’r math hwn o archwilio creadigol wrth wraidd dull y Coleg o ymdrin â hyfforddiant, boed hynny’n gweithio gyda pherfformiad digidol trochol neu fydoedd rhyngweithiol gemau.

Ein graddedigion yw’r enghreifftiau gorau o’r hyn sy’n digwydd pan fydd myfyrwyr yn cael eu grymuso i archwilio, cydweithio ac arbenigo:

Daeth Beth Lewis yn arbenigwr ym maes realiti rhithwir tra ei bod yn dal yn fyfyrwraig, gan gyfansoddi ar gyfer perfformiadau setiau pen byw. Gwnaeth hefyd greu’r sgoriau ar gyfer Macbeth a Dream gan Gwmni Richard Burton, a gyd-gyfarwyddwyd gan Gyfarwyddwr Perfformio Drama y Coleg, Jonathan Munby, a’r Brodyr Matsena. Aeth ymlaen i fod yn gyfansoddwr a chynhyrchydd ar gyd-gynhyrchiad arloesol y Brodyr Matsena gyda Sadler’s Wells, ‘Shades of Blue’.

Graddiodd yn 2023 ac mae bellach yn gyfansoddwr, artist sain a thechnolegydd creadigol, yn creu sgoriau trochol ar gyfer dawns a pherfformiadau byw, ac yn cynllunio gosodiadau sain rhyngweithiol gan ddefnyddio realiti rhithwir a thechnoleg trochol arall. Mae hi’n gweithio gydag artistiaid a sefydliadau gan gynnwys Sky Arts, a Chwmni Dawns Gyfoes Cenedlaethol Corea.

Mae Joanna Higginbottom, sy’n hanu’n wreiddiol o Ogledd Cymru, bellach yn gweithio yn Los Angeles fel cyfansoddwr a chynhyrchydd cerddoriaeth ar gyfer y byd ffilmiau, teledu a gemau.

Mae Jack Melham bellach yn Brif Gynllunydd Cerddoriaeth ac enillydd gwobr Bafta yn Creative Assembly, datblygwr gemau Ewropeaidd hynod lwyddiannus. Erbyn hyn mae’n gyfrifol am yr holl gerddoriaeth mewn gemau ar draws masnachfraint Total War Creative Assembly, a bydd yn dod yn ôl i’r Coleg i siarad â myfyrwyr a rhannu ei brofiadau.

Total War: Attila oedd y prosiect cyntaf i Jack weithio arno yn Creative Assembly, a’r tro cyntaf iddo weithio ar gerddoriaeth gemau yn broffesiynol. Wrth iddo ddathlu ei ben-blwydd yn 25 oed, mae’n siarad am sut y creodd y gerddoriaeth ddeinamig i gynrychioli’r gwahanol ddigwyddiadau ar faes y gad.

Ers pum mlynedd mae Kina Miyamoto wedi bod yn gweithio fel cynllunydd sain yn Capcom, un o gynhyrchwyr gemau mwyaf y byd yn Japan. 

Mae hi wedi arbenigo mewn creu sain y gelyn ar gyfer Resident Evil 4, a ryddhawyd ym mis Mawrth 2023 ac sydd wedi gwerthu dros 4 miliwn o unedau ledled y byd hyd yma. Yn fwyaf diweddar, mae hi wedi bod yn arwain prosiectau gan weithio fel cyfarwyddwr sain.

Ac yntau’n mynd i’w flwyddyn olaf yma yng Nghaerdydd, dechreuodd Jacob ei daith yn astudio piano jazz. 

Symudodd ymlaen i faes cyfansoddi ac yn ei ail flwyddyn bu’n gweithio ar bypedwaith: roedd Spawn yn seiliedig ar gêm gyfrifiadurol o’r 1980au/90au wedi’i lleoli mewn ystafell wely person ifanc, yng nghwmni cyfansoddwyr-cerddorion byw wrth iddo weithio fel rhan o dîm creadigol cydweithredol, a roddodd brofiad proffesiynol hollbwysig ac agor profiadau newydd iddo.