BMus (Anrh) Cerddoriaeth – Cyfansoddi

Mae’r cwrs cerddoriaeth hwn yn cynnig dewis o fodiwlau arbenigol i fyfyrwyr sydd am ddilyn gyrfa mewn cyfansoddi cerddoriaeth. Gan weithio mewn amrywiaeth o leoliadau ensemble, byddwch yn cynhyrchu trefniant neu gyfansoddiadau gwreiddiol ac yn dysgu’r holl sgiliau proffesiynol sydd eu hangen ar gyfer perfformio a recordio byw. 

Mae eich prif astudiaeth yn cynnwys dosbarthiadau perfformio, dosbarthiadau ymarferol, gweithdai, sesiynau stiwdio, darlithoedd, seminarau, prosiectau grŵp a chyfleoedd i gymryd rhan mewn profiad gwaith. 

Drwy gydol y cwrs, cewch gyfle i archwilio’r sgiliau canlynol mewn dosbarthiadau a thiwtorialau un-i-un: 

• harmoni uwch; gwrthbwynt; offeryniaeth; trefnu; ysgythru sgoriau; arwain; dadansoddi; byrfyfyrio; canu corawl; deall gwahanol arddulliau cyfansoddi 
• recordio; cymysgu; meistroli; creu cyfansoddiad o fewn amgylchedd rhithwir; midi; synthesis; plunderphonics; ffilmio; golygu; a chodio 

Byddwch yn dewis o blith amrywiaeth eang o fodiwlau a fydd yn eich helpu i greu gyrfa gerddorol sy’n cyd-fynd â’ch dewisiadau a’ch uchelgeisiau. Ac os nad ydych chi’n siŵr sut beth fydd bywyd ar ôl graddio ar hyn o bryd, byddwn yn eich cefnogi ac yn rhoi lle i chi feddwl am hynny. Rydyn ni hefyd wedi cynnwys asesu rheolaidd yn eich hyfforddiant, gan greu ‘deialog’ barhaus sy’n hanfodol i’ch helpu i dyfu a datblygu fel artist. 

Cysylltu â chymunedau 
Byddwch yn ymgysylltu â chynulleidfaoedd amrywiol ac yn rhannu eich gwaith â chymunedau ledled Cymru. Gallai hyn gynnwys perfformiadau cymunedol, gweithdai cerddoriaeth i ysgolion, allgymorth addysgol a phrosiectau cymunedol eraill. 
 
Darganfyddwch ddewis cynhwysol o gerddoriaeth 
Yn ein dosbarthiadau cerddoriaeth a chymdeithas, byddwch yn archwilio sut mae cerddoriaeth wedi cael ei defnyddio i hybu newid cymdeithasol, gan archwilio’r ffactorau allweddol a arweiniodd at greu repertoires amrywiol. Drwy edrych ar amrywiaeth fwy cynhwysol o gerddoriaeth, byddwch yn astudio gweithiau gan artistiaid LGBTIQA+, yn ogystal â chyfansoddwyr ac artistiaid Du, Asiaidd ac ethnig amrywiol. 
 
Dod yn artist moesegol a hunanymwybodol 
Byddwch hefyd yn cael eich cefnogi i ddatblygu eich arferion gweithio moesegol a chynaliadwy eich hun, gan eich helpu i feithrin ymwybyddiaeth, proffesiynoldeb a sgiliau cyfathrebu ar gyfer y llwybr gyrfa yr hoffech ei ddilyn ar ôl i chi raddio. 

Yn ystod eich gradd, bydd angen i chi gwblhau 180 o gredydau ar lefel 4, 180 ar lefel 5 a 120 ar lefel 6 i raddio gyda gradd BMus (Anrh) Cerddoriaeth, wedi’i dilysu gan Brifysgol De Cymru. 

Mae ein graddedigion yn mynd ymlaen i yrfaoedd llwyddiannus ar draws y diwydiant cerddoriaeth - o berfformiadau cerddorfaol ac opera i gyfansoddi ar gyfer ffilm, teledu a gemau, neu arwain prosiectau ac ensembles addysg cerddoriaeth. Maent yn gweithio gyda sefydliadau blaenllaw gan gynnwys Opera Cenedlaethol Cymru, BBC NOW a’r Tŷ Opera Brenhinol.