Rhiannon Pritchard

Graddiodd Rhiannon o Goleg Brenhinol Cerdd a Drama Cymru yn 2009.

Mae hi wedi derbyn llawer o wobrau am ei gwaith fel cyfeilydd a répétiteur gan gynnwys Gwobr Seligman Opera Cenedlaethol Cymru, gwobr Mansel Thomas a Gwobr Cyfeilydd CBCDC, a Gwobr Goffa Eleri Evans, gwobr y cyfeilydd yn yr Eisteddfod Genedlaethol.

Mae galw mawr am Rhiannon fel cyfeilydd ledled Cymru, ac mae’n gyfeilydd swyddogol ar gyfer tair o brif wyliau cerddorol Cymru: yr Eisteddfod Genedlaethol, Eisteddfod Ryngwladol Llangollen ac Eisteddfod yr Urdd. Dros yr ychydig flynyddoedd diwethaf mae hi wedi gweithio gyda nifer o gantorion adnabyddus gan gynnwys Syr Bryn Terfel, Gwyn Hughes Jones, Rebecca Evans ac Elin Manahan Thomas. Ar hyn o bryd mae hi’n hyfforddwr llais a chyfeilydd ar gyfer adran Llais CBCDC, ac mae hefyd yn diwtor piano preifat. 

Mae Rhiannon hefyd yn gweithio gyda llawer o gorau gan gynnwys Côr CF1 - enillydd Côr y Flwyddyn y BBC 2014, ‘Côr Cymysg Cymru’ S4C 2019/2022, a Chôr y Byd 2022. 

Mae hi’n gweithio’n helaeth fel répétiteur ac animateur gyda llawer o gwmnïau gwahanol sy’n cynnwys Opera Cenedlaethol Cymru, y BBC, Elusen Aloud, Cerdd Byw Nawr, Mahogany Opera, Côr Forget Me Not a Cerddoriaeth mewn Ysbytai. Yn y maes hwn mae ganddi brofiad helaeth o weithio mewn llawer o wahanol leoliadau (Prif Ffrwd, SEND, Unedau Dementia, Cartrefi Gofal, a Wardiau Ysbyty) a gyda gwahanol grwpiau oedran (Cynradd, Uwchradd, Oedolion Ifanc a Phobl Hŷn). Mae hi hefyd yn gweithio’n rheolaidd gyda Cherddorfa Novello a’r British Sinfonietta. 

Mae ei gwaith wedi ei gweld hi’n teithio i Affrica, America, Canada, India, yr Emiraethau Arabaidd Unedig ac Ewrop. 

Mae cynyrchiadau nodedig Rhiannon yn cynnwys ‘Dead Man Walking’ a ‘Blaze of Glory’ Opera Cenedlaethol Cymru, ‘Kommilitonen’ Opera Ieuenctid Cenedlaethol Cymru, ‘Cunning Little Vixen’ a ‘The Marriage of Figaro’ Coleg Brenhinol Cerdd a Drama Cymru yn ogystal â llawer o gynyrchiadau Golygfeydd Opera, a ‘Tiger Bay’ Canolfan Mileniwm Cymru.