MMus Perfformio Hanesyddol

Mae ein cwrs meistr mewn perfformio hanesyddol yn cynnig amgylchedd cyffrous i chi gryfhau eich perthynas â’ch crefft, gan gynnig hyfforddiant arbenigol mewn detholiad o arddulliau cerddorol, o’r Dadeni i’r 19eg ganrif.

P’un ai ydych chi’n ganwr neu’n offerynnwr, byddwch yn cymryd rhan mewn hyfforddiant un i un ac yn cael eich mentora gan rai o brif ymarferwyr y diwydiant, yn ogystal â mynychu dosbarthiadau, gweithdai a dosbarthiadau meistr wedi’u teilwra’n arbennig gydag artistiaid rhyngwladol enwog.

Cewch arbenigo yn unrhyw rai o’r meysydd hyn fel rhan o’ch cwrs:

• Pres
• Gitâr
• Telyn
• Piano
• Offerynnau taro
• Llinynnol
• Llais
• Chwythbrennau

Wrth hyfforddi gydag offerynnau cyfnod – sy’n cynnwys gweithio gyda harpiscordiau a fortepianos o wahanol gyfnodau – byddwch yn dysgu amrywiaeth o arddulliau hanesyddol, gan ennill gwybodaeth sy’n rhan allweddol o bortffolio sgiliau cerddor hyblyg a chyflawn.

Mae ein cwrs yn hyblyg, sy’n eich galluogi i deilwra eich rhaglen astudio yn unol â’ch diddordebau cerddorol a’ch uchelgais o ran gyrfa. Os ydych chi’n ganwr, byddwch yn cymryd rhan yn ein dosbarthiadau iaith, symud a drama, a bydd yr offerynwyr yn cymryd rhan yn ein dosbarthiadau offerynnol arbenigol, uwch.

Mae cael ymagwedd sy'n dangos ymwybyddiaeth o hanes at amrywiol arddulliau cerddorol yn sgil hanfodol i bob artist sy’n gweithio heddiw. Er y bydd ymchwil a myfyrio yn sail i ddatblygu eich celfyddyd greadigol, byddwch hefyd yn cael cyfleoedd i berfformio a chydweithio y tu allan i’r dosbarth. Gallwch gymryd rhan ym mhopeth, o ddatganiadau unigol i berfformiadau ensemble ar draws y Coleg yn ein cyfleusterau modern.

• Bydd eich hyfforddiant arbenigol yn gynhwysfawr ac yn amrywiol: byddwch yn cael cymysgedd o wersi un i un – sef ‘prif astudiaeth’ – ynghyd â dosbarthiadau perfformio, gweithdai, dosbarthiadau meistr a hyfforddiant.
  
• Cewch eich arwain gan arbenigedd Dr Simon Jones, feiolinydd enwog sydd wedi perfformio ac wedi recordio’n rhyngwladol fel arweinydd cerddorfaol a cherddor siambr. Mae tiwtoriaid eich cyrsiau hefyd yn cynnwys rhai o’r perfformwyr mwyaf dylanwadol ac uchel eu parch yn y byd, fel Anneke Scott, Jeremy West, Ross Brown, Katy Bircher, Jonathan Manson a Rachel Podger. Maent yn eich mentora yn ogystal â chynnig cyfleoedd rhwydweithio ac addysg o’r radd flaenaf i chi.
  
• Mae gennych chi’r rhyddid i siapio eich modiwlau craidd i gyd-fynd â’ch sgiliau a’ch nodau gyrfa. Mae rhywfaint o hyblygrwydd i'r fformatau asesu mewn rhai modiwlau, er mwyn i chi allu profi beth rydych wedi’i ddysgu mewn ffordd sy’n addas i chi.
  
• Byddwch hefyd yn cael gweithio gyda’r artistiaid rhyngwladol enwog sy’n ymweld â’r Coleg fel rhan o’n rhaglen o berfformiadau cyhoeddus.
  
• Rydym yn weithgar yn lleol, yn genedlaethol ac yn rhyngwladol. Mae ein cysylltiadau agos ag amrywiaeth o sefydliadau celfyddydol blaenllaw yn cynnig cyfleoedd i rwydweithio a mentora, sy’n hanfodol er mwyn paratoi ar gyfer gyrfa gerddorol.
  
• Mae ein cwrs wedi’i strwythuro i roi llawer o gymorth i chi fel dysgwr unigol, ond mae hefyd yn cynnig cyfleoedd i chi gydweithio â myfyrwyr ar eich cwrs a’r rheini sy’n astudio ar ein cyrsiau drama, gan eich galluogi i ffurfio partneriaethau creadigol a fydd yn para ymhell ar ôl i chi raddio.
  
• Bydd hanner eich ail flwyddyn yn canolbwyntio ar ddatblygu prosiectau proffesiynol, sy’n gysylltiedig â phrofiadau yn y byd go iawn. Mae’r meysydd y gallwch ganolbwyntio arnynt yn cynnwys ymchwil, addysgu, cerddoriaeth gymunedol, ymarfer creadigol cydweithredol, cyfansoddi a chelfyddyd ddigidol. Fel rhan o hyn, byddwch yn cwrdd yn rheolaidd â mentoriaid arbenigol, gan eich helpu i ehangu eich rhwydwaith o gysylltiadau yn y diwydiant.
  
• Byddwch hefyd yn creu ac yn curadu eich prosiectau perfformio eich hun, sy’n eich galluogi i wneud gwaith ymchwil manylach i feysydd cerddoleg a pherfformio.
  
• Gallwch hefyd astudio agweddau eraill ar gelfyddyd gerddorol fel Techneg Alexander, dyblu offerynnau a hyfforddiant uwch mewn cerddoriaeth siambr hanesyddol.