Dr Jennie Joy Porton

• PhD mewn Cerddoriaeth, Royal Holloway, Prifysgol Llundain
• MMus (Rhagoriaeth) - Prif Astudiaeth ar y Cyd, clarinét a sacsoffon, Coleg Brenhinol Cerdd a Drama Cymru
• BMus (Anrh) – Prif Astudiaeth ar y Cyd clarinét a sacsoffon, y Coleg Cerdd Brenhinol

Mae Jennie yn berfformiwr, darlithydd ac ymchwilydd prysur. A hithau’n hanu o ganol dinas Caerdydd, aeth i’r Coleg Cerdd Brenhinol flwyddyn yn gynnar pan oedd yn 17 oed ar lwybr Prif Astudiaeth ar y Cyd ar gyfer y clarinét a’r sacsoffon, llwybr nad yw’n cael ei ddyfarnu’n aml iawn. 

Treuliodd semester yn astudio’r clarinét yn Universität Mozarteum Salzburg gydag Alois Brandhofer, a chafodd hyfforddiant sacsoffon dwys yn Efrog Newydd gan Dr Paul Cohen o Ysgol Gerdd Manhattan. 

Gyda chefnogaeth Ymddiriedolaeth Gerddorol Iarlles Munster, Sefydliad Sain Universal Music UK (Sefydliad Sain EMI gynt), Ymddiriedolaeth Elizabeth Evans a Chyngor Celfyddydau Cymru, cwblhaodd Jennie MMus yng Ngholeg Brenhinol Cerdd a Drama Cymru, hefyd ar lwybr Prif Astudiaeth ar y Cyd clarinét a sacsoffon, gan ennill y wobr am y marc uchaf yn ei datganiad ôl-raddedig.

Mae gan Jennie PhD o Brifysgol Royal Holloway, a astudiodd gyda dyfarniad ysgoloriaeth, gan archwilio safbwyntiau cyn-fyfyrwyr o arferion conservatoire dros dri degawd o bresenoldeb. Mae’r ymchwil yn canolbwyntio ar ddosbarth, pŵer a hunaniaeth, drwy ganolbwyntio ar themâu syniadau am dalent, y cwricwlwm ac iechyd a llesiant. 

Gyda diddordeb brwd mewn mynediad a chynhwysiant, Jennie oedd yr ymgynghorydd ymchwil ar gyfer prosiect ymchwil Ehangu Mynediad a Chyfranogiad Conservatoire Iau CUK, gan arwain at adroddiad terfynol ar gyfer Bwrdd Cyfarwyddwyr CUK gydag argymhellion ar draws y sector (2022). 

Roedd Jennie yn rhan o’r tîm Cynaliadwyedd ac Effeithiau ar gyfer prosiect GALWAD a ariannwyd gan Gyngor Celfyddydau Cymru (2022). Gan arwain at gynhyrchiad teledu byw ar Sky Arts, roedd hwn yn brosiect cydweithredol amlochrog gyda dulliau arloesol o ymdrin â mentrau cynaliadwy fel elfen greiddiol ac ymrwymiad; Jennie oedd yn gyfrifol am ddelio â data yn ymwneud â datblygu cynaliadwy a strategaethau lliniaru cysylltiedig, a llesiant y gweithlu, ac mae wedi’i hyfforddi mewn rhaglenni casglu data allyriadau carbon ar lefel y diwydiant (TRACE, BAFTA Albert, Theatre Green Book, Julie’s Bicycle). Gan adeiladu ar ganlyniadau data’r prosiect hwn, bu Jennie a chydweithiwr GALWAD Ruth Springer yn cydweithio ar ymchwil i feincnodi allyriadau carbon cynyrchiadau Coleg Brenhinol Cerdd a Drama Cymru (2024). 

Ar hyn o bryd mae Jennie yn cydweithio ar ymchwil gyda chyd-weithiwr yng Ngholeg Brenhinol Cerdd a Drama Cymru, yr Athro Helena Gaunt a Dr James Lea, ar bwnc conservatoires, trothwyon a lleoliadau preswyl.  

Mae hi’n therapydd cymwysedig ac yn awyddus i adeiladu ar ei chanfyddiadau doethurol ar lesiant yng nghyd-destun y conservatoire, gydag ymchwil bellach i faes iechyd a llesiant a’r celfyddydau.  

Fel perfformiwr llawrydd, mae Jennie yn mwynhau gyrfa amrywiol. Mae ei huchafbwyntiau diweddar yn cynnwys cynhyrchiad cyntaf erioed Matthew Bourne o Romeo a Juliet, gyda chyfnod preswyl yn Sadler’s Wells, dangosiad byw o berfformiad mewn sinemâu ledled y DU a thaith o gwmpas y DU. Hi hefyd oedd y clarinét cyntaf (rhannu swydd) ar gyfer eu cynhyrchiad o Nutcracker! yn Llundain. Mae gan Jennie berthynas lawrydd hirsefydlog â Cherddorfa Genedlaethol Gymreig y BBC ac Opera Cenedlaethol Cymru, ac mae’n gweithio’n aml gyda nhw ar gyfer cyngherddau, cynyrchiadau teledu, teithiau yn y DU ac ar draws y byd, gan berfformio ar y clarinét a’r sacsoffonau.

Mewn theatr gerdd, Jennie oedd y deiliad cadair ar Miss Saigon (taith Cameron Mackintosh, y DU ac Iwerddon) a The Show Must Go On (Theatr Dominion, Llundain) ac mae wedi dirprwyo ar lu o sioeau yn y West End ac ar draws y DU gan gynnwys Phantom of the Opera, Chicago, Cats, Half a Sixpence a Billy Elliot. Perfformiodd Jennie hefyd ar gymal y DU o daith fyd-eang Idina Menzel mewn lleoliadau gan gynnwys Arena Wembley. Mae ei huchafbwyntiau eraill yn cynnwys perfformiadau masnachol gyda’r grŵp disgo enwog o Efrog Newydd, Escort (cymalau’r daith yn Ewrop).

Mae Jennie yn addysgu sacsoffon a chlarinet/sacsoffon gan ddyblu yng Ngholeg Brenhinol Cerdd a Drama Cymru, yn ogystal â darlithio’n academaidd ar amrywiaeth o fodiwlau israddedig ac ôl-raddedig, yn bennaf y rhai sydd â ffocws ar ddiwydiant a diwylliant cymdeithasol.

Hi sy’n cydlynu’r llwybr aml-offerynnau chwyth sy’n canolbwyntio ar theatr gerdd, ac mae hefyd yn diwtor astudio dramor ar gyfer myfyrwyr cyfnewid rhyngwladol. Y tu allan i Goleg Brenhinol Cerdd a Drama Cymru, Jennie oedd tiwtor sacsoffon Ysgol Cerddoriaeth Prifysgol Caerdydd am flynyddoedd lawer, ac mae hi hefyd wedi bod yn addysgu ac yn hyfforddi yng Ngŵyl Gerdd Haf Efrog Newydd.

Mae Jennie yn awyddus i glywed gan ddarpar fyfyrwyr ymchwil doethurol sydd â diddordeb mewn materion cymdeithasol-ddiwylliannol mewn perthynas â cherddoriaeth a hefyd y celfyddydau yn ehangach, ar draws y sbectrwm o addysg i feysydd proffesiynol. 

Mae meysydd eraill o ddiddordeb goruchwyliol yn cynnwys: 

• pŵer a hunaniaeth
• hyfforddiant conservatoire
• iechyd a llesiant mewn cerddoriaeth a’r celfyddydau
• cynaliadwyedd yn y celfyddydau. 

Darlithiau gwadd

• Drwy wahoddiad, mae Jennie wedi darlithio fel gwestai ym Mhrifysgol Royal Holloway a Phrifysgol Celfyddydau Gwlad yr Iâ.

Penodau mewn llyfrau

• Porton, J.J. (2023) ‘Social Inclusion in Contemporary British Conservatoires: Alumni Perspectives’ yn Bull, A., Scharff, C. a Nooshin, L. (gol.) Voices for Change in the Classical Music Profession. Rhydychen: Gwasg Prifysgol Rhydychen