The Bute Quintet

Mae Pumawd Bute yn ensemble sydd wedi ennill sawl gwobr, a’i genhadaeth yw hyrwyddo cerddoriaeth siambr gyfoes a thanberfformio, gan gyflwyno delwedd artistig ddigyfaddawd i amrywiaeth o gynulleidfaoedd.

Pam wnaethoch chi ddewis astudio’r cwrs MMus yn CBCDC?

Dewisais y cwrs MMus Perfformio Cerddorfaol yng Ngholeg Brenhinol Cerdd a Drama Cymru oherwydd fy mod yn teimlo ei fod yn cynnig y cyfleoedd gorau ar gyfer cynlluniau lleoliad cerddorfaol gyda cherddorfeydd BBC NOW ac Opera Cenedlaethol Cymru. Rydw i hefyd wedi bod yn hynod ffodus i fod yn rhan o ensembles gwych yn y Coleg, megis Chwyth Siambr, gan berfformio darnau fel Geysir gan Simpson, Gran Partita Mozart, a Serenade for Winds gan Dvorak. Yn ogystal, rydw i wedi cael y fraint o berfformio fel arweinydd adran yng Ngherddorfa Symffoni Coleg Brenhinol Cerdd a Drama Cymru, gan fireinio’r sgiliau rwy’n bwriadu eu defnyddio yn fy ngyrfa broffesiynol.

(Sam Willsmore - Obo)

Sut wnaethoch chi deilwra’ch profiad i gyd-fynd orau â’ch dyheadau/nodau gyrfa/cynlluniau ar gyfer y dyfodol?

Mae’r lleoliadau a gynigir fel rhan o’r radd Meistr mewn Perfformio Cerddorfaol yn ddigyffelyb, gan ddarparu profiad symffonig ac operatig amhrisiadwy. Maent wedi chwarae rhan arwyddocaol mewn dylanwadu ar sut rwy’n mynd ati i berfformio heddiw.

(Hannah Harding - Basŵn)

A fu unrhyw adegau nodedig yn ystod eich cyfnod ar y cwrs?

Bu un foment gofiadwy iawn yn ystod fy nghyfnod lleoliad cyntaf yn y BBC. Byddwch fel arfer yn chwarae am gyfnodau byr ar leoliad gwaith, ond y tro hwn bu ychydig o gymysgwch gyda’r rota ac ni fynychodd yr ail ffliwtydd i sesiwn tair awr o hyd yn y bore. Gofynnwyd i mi chwarae’r sesiwn gyfan yn sedd yr ail ffliwt a phicolo, a chefais hefyd fy nhalu am y gwaith. Roedd yn brofiad gwefreiddiol, heriol ac annisgwyl, a gwnaeth i mi sylweddoli hyd yn oed yn fwy ofynion bod â sedd mewn cerddorfa.

(Gabriella Alberti - Ffliwt)

Sut wnaeth y cwrs eich helpu yn eich llwybr gyrfa ar ôl graddio?

Rydw i eisoes wedi dechrau datblygu gyrfa bortffolio mewn addysgu a pherfformio. Fel clarinetydd cerddorfaol llawrydd, rydw i wedi gweithio gydag Opera Cenedlaethol Cymru a’r English Symphony Orchestra. Rydw i nawr hefyd yn ystyried fy hun yn gerddor siambr, diolch i fy nghydweithwyr gwych ym Mhumawd Chwyth Bute. Rwy’n llawn cyffro i barhau i adeiladu fy ngyrfa a chryfhau’r cysylltiadau rydw i wedi’u gwneud o fewn y diwydiant.

(Meg Davies - Clarinét)

Beth fu eich hoff ran o astudio yn CBCDC hyd yma?

Mae dau ddigwyddiad wedi aros yn fyw yn y cof. Y cyntaf oedd y profiad o eistedd yn adran corn BBC NOW tra’n chwarae Mahler 5, wedi fy syfrdanu gan yr holl waith yr oedd y chwaraewyr yn ei gynhyrchu, hyd yn oed yn ystod ymarferion. Yr ail oedd eistedd y tu ôl i Angus West, cyn Brif Chwaraewr Corn WNO, yn ystod y Gala Opera gyda Carlo Rizzi. Roedd gwrando ar ei chwarae gwych yn brofiad ysgytwol, wrth imi sylweddoli fy mod yn rhan o’r gerddorfa, yn perfformio ochr yn ochr â cherddorion mor rhyfeddol.

(Nathan Barker - Corn Ffrengig)