Rhiannon Bedford

Pam wnaethoch chi ddewis astudio’r cwrs MMus yn CBCDC?

Ar ôl treulio peth amser allan o addysg roeddwn yn teimlo’n barod i wthio fy hun a fy chwarae. Ar ôl dilyn fy astudiaethau gradd mewn prifysgol, roedd mynd i gonservatoire ar gyfer gradd Meistr yn teimlo ychydig yn frawychus ond gwnaeth CBCDC i mi deimlo fy mod yn cael fy ngwerthfawrogi a’m cefnogi drwy gydol y broses ymgeisio.

Sut wnaethoch chi deilwra’ch profiad i gyd-fynd orau â’ch cynlluniau ar gyfer y dyfodol?

Roeddwn am i gymaint â phosibl o ddrysau fod yn agored i mi ar ôl graddio felly ceisiais gytuno i gymaint o bethau â phosib! Bu gennyf ddiddordeb mewn perfformio cerddoriaeth gyfoes ac arbrofol erioed, ac rwy’n mwynhau dod o hyd i ffyrdd o wthio fy hun yn greadigol fel feiolinydd. Yn fy mlwyddyn gyntaf dewisais yr opsiwn ‘Perfformio Cyfoes’ fel rhan o’m Prif Astudiaeth a pherfformiais Violin Phase gan Steve Reich gyda thraciau cefndir roeddwn i wedi’u recordio yn stiwdio’r coleg. Roedd y profiad hwn yn gyfle gwych i weithio mewn stiwdio recordio a pherfformio gyda thraciau wedi’u recordio ymlaen llaw, i gyd mewn amgylchedd cefnogol gydag arweiniad arbenigol.

A fu unrhyw adegau nodedig yn ystod eich cyfnod ar y cwrs?

Roeddwn yn arbennig o falch o fod wedi arwain yr ensemble ar gyfer cynhyrchiad Opera’r Haf o Die Fledermaus dan gyfarwyddyd Alice Farnham ar ddiwedd fy mlwyddyn gyntaf yn CBCDC. Gan mai dyma fy nhro cyntaf mewn rôl blaenwr, roedd yn teimlo fel cam arwyddocaol i mi. Teimlais i mi gael cefnogaeth dda gan fy nghyfoedion a’r holl staff a gymerodd ran yn y prosiect, a drawsnewidiodd yr hyn a oedd yn teimlo’n frawychus ar y cychwyn i fod yn brofiad gwych a chofiadwy.

Sut wnaeth y cwrs eich helpu yn eich llwybr gyrfa ar ôl graddio?

Roedd astudio yn CBCDC wedi rhoi’r amser a’r cyfleoedd i mi ddatblygu fy sgiliau fel offerynnwr a rhoddodd brofiad eang i mi mewn perfformio fel unawdydd ac mewn ensemble. Fe wnaeth y cwrs fy ngalluogi i greu cysylltiadau sydd wedi arwain at gyfleoedd gwaith proffesiynol ers graddio. Yn bwysicaf oll, rhoddodd fy nghyfnod yn CBCDC hwb sylweddol i’m hyder yn fy ngallu fel cerddor a gweithiwr proffesiynol, a’m grymuso i fod yn greadigol yn y mathau o waith rwy’n chwilio amdanynt.

I bwy fyddech chi’n argymell y cwrs hwn?

Byddwn yn argymell y cwrs hwn i unrhyw un sy’n edrych am amgylchedd cefnogol i ddatblygu eu hymarfer a pharatoi ar gyfer gyrfa yn y diwydiant.