Jeffrey Lloyd-Roberts

Bu Jeffrey Lloyd-Roberts, y tenor o Gymru, yn astudio Cerddoriaeth ym Mhrifysgol Caerhirfryn cyn astudio yn yr RNCM gyda Barbara Robotham.
Yn dilyn portread Jeff o Peter Grimes yng nghynhyrchiad Opera North Phyllida Lloyd, enillodd y cwmni Wobr y Gymdeithas Ffilharmonig Frenhinol, Gwobr South Bank a Gwobr TMA.

Mae gan Jeff gysylltiad cryf â cherddoriaeth gyfoes, yn enwedig gwaith Harrison Birtwistle. Mae ei berfformiadau'n cynnwys Punch and Judy yn Amsterdam, sawl rôl yn The Last Supper (Glyndebourne, Neuadd y Frenhines Elizabeth, yr Alban a Milan), a’r Brenin Arthur yn Gawain yng Ngŵyl Salzburg a'r Barbican. Ysgrifennodd Birtwistle y cantata Angel Fighter i Jeff, a chafodd ei berfformio am y tro cyntaf erioed yn Thomaskirche, Leipzig yn 2010, gyda’r premiere ym Mhrydain yn sioe Proms y BBC yn 2011.

Mae repertoire eang Jeff, sy'n cael ei gydnabod fel un o actorion canu mwyaf blaenllaw'r DU, wedi golygu ei fod wedi perfformio gyda thai opera a cherddorfeydd mawr ledled y byd.

Yn gredwr cryf mewn rhyddid corfforol a defnyddio'r corff cyfan a'r meddwl i greu sain egnïol, mae dull addysgu cyfannol Jeff yn rhoi pwyslais ar sain gysefin ar y cyd â thechneg chiaroscuro / bel canto yr Eidal. Mae'r cyfuniad hwn yn cefnogi rhyddid lleisiol a stamina, gan alluogi cantorion i greu cerddoriaeth gyda bwriad a chysylltu'n ddwfn â'r testun.

Roedd Jeff ar flaen y gad o ran datblygu adrannau addysg Opera Teithiol Lloegr, Opera Cenedlaethol Lloegr, Glyndebourne, Opera Cenedlaethol Cymru, Opera North a ROH ddechrau'r 1990au. Mae wedi cyflwyno dosbarthiadau meistr yn RNCM a Trinity Laban ac wedi hyfforddi cantorion ifanc yn Opera North a Glyndebourne.

Roedd yn athro llais gwadd ym Mhrifysgol Southampton ac mae bellach yn addysgu yn Ysgol Gerdd Prifysgol Caerdydd ac yng Ngholeg Brenhinol Cerdd a Drama Cymru.

Mae Jeff hefyd yn hyfforddwr llais i Gôr Cenedlaethol Ieuenctid Cymru ac Academi Glyndebourne.

Fel darlledwr a chyflwynydd, mae Jeff wedi gweithio i BBC Radio 3, y World Service a Proms Extra, ac mae'n byndit ac yn ohebydd rheolaidd i BBC Canwr y Byd Caerdydd.