Jazz Promotion Network: Showcase I

Ymunwch â ni dros ddwy noson, fel rhan o Gynhadledd Rhwydwaith Hyrwyddo Jazz, i ddathlu’r artistiaid jazz gorau o bob cwr o’r DU ac Iwerddon. Bydd y nosweithiau arddangos hyn yn croesawu rhestr wych o artistiaid gan gynnwys y cerddorion Huw Warren ac Angharad Jenkins o Gymru, a fydd yn cyflwyno eu prosiect deuawd newydd ‘The Gower Nightingale / Eos Gŵyr’ sy’n archwilio traddodiadau cerddorol, hunaniaeth ac iaith gan ganolbwyntio ar Benrhyn Gŵyr ac Abertawe lle magwyd y ddau gerddor. Cyhoeddir mwy o artistiaid yn fuan. Cefnogir gan Gyngor Celfyddydau Cymru a chyd-letyir gan CBCDC ac Adran Gerddoriaeth Prifysgol Caerdydd.

Mae’n bleser mawr gan CBCDC ynghyd ag Adran Gerddoriaeth Prifysgol Caerdydd gynnal, am y tro cyntaf erioed yng Nghymru, Gynhadledd ac Arddangosfa Rhwydwaith Hyrwyddo Jazz. Yn ogystal â dod â’r gymuned jazz o bob cwr o’r DU ac Iwerddon ynghyd, gan gynnwys cerddorion, addysgwyr, labeli, a mwy, bydd y gynhadledd (a gynhelir yn Adran Gerddoriaeth Prifysgol Caerdydd) yn edrych ar y rôl unigryw y mae’r Gymraeg yn ei chwarae yn sîn jazz Cymru. Am ragor o wybodaeth, ewch i: www.jazzpromotionnetwork.org.uk