Conservatoire Iau (diwrnod llawn)

Mae’n fwyaf addas ar gyfer plant 8 i 18 oed y mae eu lefel mynediad fel a ganlyn.

• cantorion, chwaraewyr chwythbrennau ac offerynnau pres ac offerynwyr taro sydd, neu a fydd, erbyn eu bod ym Mlwyddyn 11 ar Radd 6 neu gyfwerth a thu hwnt
• chwaraewyr llinynnau a phiano sydd, neu a fydd, erbyn eu bod ym Mlwyddyn 11 ar Radd 7 neu gyfwerth a thu hwnt

Mae gwersi a dosbarthiadau’r Conservatoire Iau (diwrnod llawn: Cam 4) yn ysgogol, heriol, pleserus ac wedi’u cynllunio i’ch helpu i gyflawni eich nodau cerddorol personol. Maent yn darparu ar gyfer dysgwyr sy’n ymroddedig i greu cerddoriaeth ac sy’n awyddus i ddatblygu eu chwarae neu ganu i lefel mynediad conservatoire a thu hwnt.

Mae ein dull llawn cefnogaeth yn ceisio adeiladu eich hyder a’ch hunangred a’ch paratoi ar gyfer y cam nesaf yn eich gyrfa gerddorol. Mae ein gwersi a’n dosbarthiadau yn cael eu cyflwyno mewn amgylchedd dysgu hwyliog a phwrpasol ar gyfer y celfyddydau perfformio. Yn hollbwysig, byddwch yn cael cyfleoedd i weithio gyda phobl ifanc eraill sydd â nodau tebyg i’ch rhai chi.

Mae dysgwyr fel arfer yn aros yng Ngham 4 nes iddynt adael yr ysgol. Efallai y bydd rhai hefyd yn ymestyn eu hastudiaethau yn ystod blwyddyn/blynyddoedd i ffwrdd, ar ôl gadael addysg uwchradd. Mae llawer o ddysgwyr Cam 4, ond nid pob un o bell ffordd, yn parhau â’u hastudiaethau cerddorol mewn conservatoire neu brifysgol. Mae’r cwrs yn addas ar gyfer pob cerddor ifanc dawnus, beth bynnag yw amcanion eu gyrfa.

Cynhelir gwersi a dosbarthiadau Conservatoire Iau (diwrnod llawn: Cam 4) ar ddyddiau Sadwrn.

Ceir mynediad drwy gais, a rhaid iddo gynnwys cyflwyniad recordiad o chwarae neu ganu’r dysgwr.

Mae’r rhan fwyaf o ddysgwyr yn ymuno â’r Conservatoire Iau (diwrnod llawn: Cam 4) ym mis Medi, ar ddechrau’r flwyddyn academaidd. Gall rhai dysgwyr hefyd ddechrau ym mis Ionawr neu fis Ebrill, yn amodol ar argaeledd hyfforddiant.

Mae’r Conservatoire Iau (diwrnod llawn: Cam 4) yn costio £925 fesul tymor deg wythnos o fis Medi 2023 i fis Gorffennaf 2024. Mae gweithgareddau dewisol yn cynnwys

• dosbarth theori ABRSM a addysgir (£60 y tymor, 30 munud yr wythnos)
• astudiaeth ychwanegol (£295 y tymor, 30 munud yr wythnos)
• ymestyn eich prif astudiaeth (£147.50 y tymor am 15 munud ychwanegol yr wythnos)

Mae Cerddorion Ifanc CBCDC wedi ymrwymo i roi’r cyfle i gynifer o bobl ifanc â phosibl elwa ar yr hyfforddiant arbenigol a ddarperir gan CBCDC, waeth beth fo’u cefndir neu fodd ariannol.

Diolch i haelioni llawer o ffrindiau a chefnogwyr y Coleg, gall teuluoedd wneud cais am fwrsariaeth prawf modd er mwyn helpu i dalu ffioedd a all fod hyd at 100% o gyfanswm ffioedd y cwrs. Rydym yn rhoi pwys mawr ar wneud ein holl gyrsiau’n hygyrch i bobl ifanc sy’n ymroddedig i gerddoriaeth, gyda dros 50% o ddysgwyr presennol yn derbyn cymorth ariannol. Rydym yn eich annog i fanteisio ar y gefnogaeth hael sydd ar gael.

Daw’r cylch ymgeisio am fwrsariaeth i ben yn y mis Gorffennaf cyn mynediad mis Medi. Cynghorir teuluoedd sydd â diddordeb mewn gwneud cais am fwrsariaeth ar ôl mis Gorffennaf ar gyfer y flwyddyn academaidd sydd i ddod i gysylltu â ni i wirio a allai unrhyw gyllid sy’n weddill fod ar gael.