Mae’r modiwl Prif Astudiaeth ym mlynyddoedd un i dri wrth wraidd y profiad dysgu, ac mae’n galluogi’r myfyrwyr i ddatblygu ystod o dechnegau arbenigol a sgiliau cerddorol, prosesau cyfansoddi ymarferol a syniadau creadigol unigol o fewn cyd-destun gwybodaeth a dealltwriaeth eang o idiomau ac estheteg jazz creadigol cyfoes. Mae’r modiwl hefyd yn caniatáu i fyfyrwyr ganolbwyntio ar agweddau ar ddatblygiad corfforol a seicolegol sy’n tanategu perfformiad a gwaith artistig creadigol. Mae’r modiwl hwn yn rhedeg drwy gydol y flwyddyn academaidd, gan gyfrif am 40 o’r 120 o gredydau sydd eu hangen. Cyflwynir prif astudiaethau drwy gyfuniad o hyfforddiant un i un wedi’i ategu gan ddosbarthiadau perfformio, gweithdai, dosbarthiadau meistr, sgyrsiau gan ymarferwyr ar ymweliad, seminarau a chyfres o ddarlithoedd i gefnogi datblygiad cerddorol ac artistig y myfyrwyr.

Mewn gwersi un i un bydd y myfyrwyr yn gweithio’n agos iawn gyda thiwtoriaid ac yn derbyn cyfarwyddyd mewn datblygu gallu technegol, gwybodaeth am arddulliau a repertoire, a sgiliau mewn cyfathrebu drwy berfformiad. Caiff pob myfyriwr ei herio i archwilio ystod o repertoire jazz a rennir, gan feithrin ymwybyddiaeth arddulliadol a dull idiomatig ar gyfer deunyddiau penodol i genre.

Mae dosbarthiadau adrannol yn ymdrin ag arddull, cyd-destun a chreu cerddoriaeth ymarferol cysylltiedig, yn ogystal â chefnogi datblygiad sgiliau penodol i berfformio genres penodol neu ddetholiad o repertoire. Mae amrywiaeth o ddosbarthiadau perfformio grŵp yn rhoi cyfleoedd i fyfyrwyr gael profiad ymarferol gwerthfawr mewn cyfathrebu drwy berfformiad, gyda sesiynau’n canolbwyntio ar arddull, gwaith byrfyfyr idiomatig a rhyngweithio grŵp.

Yn y flwyddyn gyntaf bydd dosbarthiadau ensemble bach yn astudio tri maes gwrthgyferbyniol o repertoire yn eu ffurfiau dilys a chyfoes: American Songbook, Blues a Ffync i Ymgyfuniad. Yn yr ail flwyddyn canolbwyntir ar Bebop, Byd Jazz gydag electroneg/technoleg. Mae llinynnau repertoire y drydedd flwyddyn yn adlewyrchu ffurfiau cyfoes amrywiol megis Ffurfiau Caneuon Crossover, Gwaith Byrfyfyr Llinellog ac ysgrifennu Ewropeaidd/Prydeinig, gyda phwyslais ar greu deunydd gwreiddiol sy’n crynhoi datblygiadau newydd ar draws y sbectrwm.

Anogir myfyrwyr i ddatblygu eu hymatebion personol, dadansoddol a beirniadol i berfformiad drwy fynychu cyngherddau a datganiadau yn rheolaidd fel rhan o raglennu creadigol y Coleg. Bydd dosbarthiadau meistr gydag artistiaid ar ymweliad yn cynnig cyfleoedd pellach i ddysgu gan rai o brif gerddorion jazz y byd.

Mae modiwlau Prif Astudiaeth hefyd yn rhoi hyfforddiant sylfaenol mewn sgiliau sain a fideo er mwyn galluogi myfyrwyr i recordio a rhannu eu gwaith fel artist perfformio cyfoes.

Drwy gydol y flwyddyn bydd y myfyrwyr yn derbyn cefnogaeth diwtorial ychwanegol er mwyn tracio eu hymarfer unigol a datblygiad personol drwy hunanwerthuso a myfyrio, gan gasglu ynghyd e-bortffolio. Bydd y portffolio’n dogfennu ystod o elfennau allweddol gan gynnwys cyflawniadau, heriau penodol a phrofiadau cerddorol neu greadigol arbennig a gwaith arall i gefnogi gwaith datblygu gyrfa gynaliadwy, sydd wedi’i fwriadu i lywio a chefnogi eu hunaniaeth greadigol ac artistig sy’n dod i’r amlwg.

Mae modiwl Cerddor Integredig, modiwl craidd 20 credyd ym mlynyddoedd un a dau, cwmpasu ystod o weithgareddau cysyniadol ac ymarferol sydd â’r nod o gysylltu ac integreiddio sgiliau craidd mewn harmoni, theori cerddoriaeth, canfyddiad sain y glust a dawn gerddorol corfforol.

Mae gweithdai mewn grwpiau bach yn hybu dealltwriaeth o harmoni tonyddol a ffurf drwy ymarferion ysgrifenedig a dadansoddiadau.

Mae cyfranogiad wythnosol mewn rihyrsals côr yn hybu datblygiad ymarferol ystod lawn o sgiliau sain y glust, cerddorol a chorfforol gan gynnwys canu, rhythm, darllen ar yr olwg gyntaf a gwaith byrfyfyr. Bydd y repertoire a genir mewn côr yn cynnwys ystod eang o arddulliau cerddorol, gan gynnwys cân Affricanaidd, Raga Indiaidd, Emynau Hwyliog a Roc/Pop yn ogystal â Cherddoriaeth Glasurol y Gorllewin.

Hyrwyddir dawn gerddorol integredig a chorfforol ymhellach drwy ddosbarthiadau mewn hanfodion techneg Alexander a dulliau meddwl/corff ategol.

Mae Cerddoriaeth a Chymdeithas, modiwl craidd 20 credyd ym mlynyddoedd un a dau, hefyd ar gael fel modiwl dewisol ym mlwyddyn tri ar gyfer myfyrwyr sy’n dymuno datblygu ymhellach eu sgiliau ymholi beirniadol fel paratoad ar gyfer ymgymryd â phrosiectau seiliedig ar ymchwil unigol arbenigol yn y flwyddyn olaf.

Nod y modiwlau Cerddoriaeth a Chymdeithas yw meithrin dealltwriaeth a gwerthfawrogiad cyd-destunol o rôl y cerddor mewn cymdeithas; er mwyn galluogi’r myfyrwyr i wneud synnwyr o’u profiadau eu hunain o fewn cyd-destun cymdeithasol a hanesyddol ehangach ac i symbylu archwiliad pellach drwy ddarllen, gwrando a mynychu digwyddiadau, ac felly’n cyfrannu at ehangu gorwelion creadigol.

Mae cyfres o ddarlithoedd a seminarau yn archwilio ffurf jazz o’i ddechreuad hyd heddiw, gan edrych ar yr amgylchiadau/amodau cymdeithasol wleidyddol a arweiniodd at i artistiaid penodol ddod i’r amlwg drwy gyfres o astudiaethau achos. Bydd y modiwl yn datblygu dealltwriaeth o sut y mae jazz wedi dylanwadu ar/cael ei ddylanwadu gan ffurfiau cerddorol/diwylliannol eraill a sut y mae ymgyfuniadau cerddoriaeth, cydweithrediad rhyngwladol a datblygiadau technolegol wedi hwyluso cynulleidfaoedd newydd, ond yn aml arwahanol, ar gyfer y gerddoriaeth.

Ategir darlithoedd gan seminarau trafodaeth, a fydd yn gwerthuso ystod eang o syniadau a safbwyntiau ar gyfer ystyried cerddoriaeth ‘boblogaidd’ o gymharu â ‘celf’ o gymharu â ‘gwerin’ a safle jazz yn yr hinsawdd gerddorol bresennol.

Anogir myfyrwyr i wneud synnwyr o’u profiadau eu hunain o fewn byd eahngach jazz, a datblygu sgiliau gwrando beirniadol fel modd o lunio barn artistig. Darperir cefnogaeth a chanllawiau i ddatblygu sgiliau ymchwil, astudio a chyfathrebu ysgrifenedig effeithiol.

Mae Cerddoriaeth a Chymdeithas 3 yn ceisio cyflwyno’r myfyrwyr i lu o ffyrdd y defnyddiwyd cerddoriaeth i ddylanwadu ar newid cymdeithasol. Addysgir y modiwl mewn ffurf seminar lle archwilir testunau allweddol drwy drafodaeth fanwl. Bydd y ffocws ar sut y mae cerddorion yn ymateb i’r cyd-destunau y maent yn byw ynddynt ac yn trawsnewid cymdeithas drwy eu hymyriadau. Bydd y modiwl hefyd yn ceisio datblygu sgiliau ymchwil uwch, gan adeiladu ar waith y ddwy flynedd gyntaf o astudio. Archwilir dulliau cyfoes mewn ysgolheictod cerddorol, gan gynnwys materion hil, rhyw a dosbarth, yn fanwl. Bydd y myfyrwyr yn gwneud prosiect mawr a fydd yn golygu dull mwy soffistigedig o ymresymu.

Mae Ymgysylltu yn fodiwl craidd 10 credyd a gynhelir ym mhob un o dair blynedd gyntaf y cwrs, sy’n cyflwyno ac yn atgyfnerthu’r wybodaeth a’r sgiliau sydd eu hangen ar gyfer creu cerddoriaeth gyfranogol mewn lleoliadau addysgol a chymunedol. Bydd myfyrwyr yn datblygu ymwybyddiaeth o faterion theori, ymarferol a moesegol sy’n ymwneud ag arfer cyfranogol, gan gynnwys ystyriaethau pwysig ynglŷn ag amrywiaeth a chynwysoldeb.

Yn ystod y flwyddyn gyntaf bydd y myfyrwyr yn gweithio mewn grwpiau i ddyfeisio a chofnodi perfformiad neu weithdy cerddorol sy’n addas ar gyfer ei ledaenu i leoliad cymunedol penodol. Ym mlwyddyn dau byddant yn dyfeisio ac yn cyflwyno eu gweithdy cerddoriaeth eu hunain i blant oedran cynradd. Mae blwyddyn tri yn canolbwyntio ar sgiliau a gwybodaeth benodol sydd eu hangen ar gyfer addysgu offerynwyr, cantorion neu gyfansoddwyr sy’n ddechreuwyr, gyda chyfleoedd i’r myfyrwyr gael profiad ymarferol o addysgu.

Mae Cydweithredu yn fodiwl craidd 30 credyd ym mhob un o dair blwyddyn gyntaf y Cwrs BMus, gan gyfrif am chwarter y credydau sydd eu hangen. Nod y modiwl hwn yw cynnig cyfleoedd i’r myfyrwyr ddatblygu sgiliau sylfaenol mewn cyfathrebu a rhyngweithio creadigol o fewn cyd-destunau cydweithredol amrywiol gan gynnwys ystod o ensembles llai, heb eu cyfarwyddo yn ogystal ag ensembles mwy, wedi’u cyfarwyddo fel sy’n briodol.

Mae’r profiadau hyn yn galluogi myfyrwyr i ddatblygu ymhellach eu gwybodaeth o repertoires priodol, sgiliau arbenigol ac arddulliau, gydag ymwybyddiaeth gynyddol o’r disgwyliadau a’r moesegau sydd eu hangen ar gyfer rihyrsal a pherfformiad mewn sefyllfa ensemble proffesiynol.

Cefnogir ensembles i ddatblygu technegau rihyrsal a hunangyfarwyddir yn hyderus a sgiliau arweinyddiaeth cerddorol/creadigol annibynnol.

Erbyn y drydedd flwyddyn bydd myfyrwyr yn barod i ystyried gweledigaeth gerddorol gyflawn a gwireddu hyn drwy gyfansoddi, trefnu a rihyrsal fel Arweinydd Band/Trefnydd. Mae cyfleoedd hefyd i fyfyrwyr weithio fel perfformiwr neu drefnydd /cyfarwyddwr cerddorol mewn ystod o ensembles jazz mawr megis Band Mawr, Côr Jazz a Cherddorfa Jazz.

Mae asesiadau o sgiliau perfformio ac ensemble yn rhoi cyfleoedd i fyfyrwyr ddangos ystod o sgiliau cydweithredol arbenigol. Bydd tiwtoriaid hefyd yn cyflwyno adroddiadau yn gwerthuso ymgysylltiad creadigol a chyfraniadau unigol yng nghamau paratoi a rihyrsal prosiect.

Mae’r modiwl Cydweithredu Creadigol ar gael ar lefel 4 a 5 gan redeg ochr yn ochr â’r modiwlau Cydweithredu ar draws blynyddoedd un i dri. Rhaid i ymgysylltiad myfyrwyr â’r modiwl hwn a chyfranogiad mewn prosiectau gael eu cytuno a’u gadarnhau fesul achos unigol gan Arweinydd y Modiwl a’r Pennaeth Astudiaeth perthnasol cyn cychwyn ar unrhyw waith prosiect. Mae’r modiwl yn rhoi rhyddid i’r myfyrwyr archwilio ymhellach a dyfnhau eu galluoedd a gwybodaeth o gerddoriaeth a pherfformio creadigol o fewn prosiect cydweithredol penodol. Bydd prosiectau fel arfer yn sylweddol o ran cwmpas ac yn gofyn am ymrwymiad dros gyfnod estynedig o amser gydag ensemble cerddorol bach neu fawr neu grŵp creadigol amlddisgyblaeth fel sy’n briodol i friff y prosiect. Mae ethos y modiwl hwn yn hyrwyddo archwiliad amrywiaeth o repertoire, genres, arddulliau a dulliau.

Mae cynwysoldeb yn sylfaenol i’n llwyddiant ac rydym yn ceisio rhagor o amrywiaeth ym mhob agwedd ar ein cwrs, ac o fewn ein carfan. Rydym yn cynnig gwahoddiad agored ac yn croesawu ymgeiswyr o unrhyw gefndir sy’n bodloni’r gofynion mynediad neu sy’n gallu dangos gallu cyfatebol o ran sgiliau, dawn a photensial i ymgymryd â galwadau’r rhaglen BMus. Mae’r Coleg yn ystyried pob cais yn unigol, achos wrth achos. Adolygir pob mynediad sydd ddim yn rhai safonol gan y Bwrdd Arholi, Arweinydd Rhaglen BMus, Cyfarwyddwr Cerddoriaeth a’r Pennaeth Astudiaeth perthnasol.

Yr un yw’r broses ag ydyw ar gyfer ymgeiswyr safonol. Rhaid i’r rheini sy’n bodloni’r gofynion mynediad Prif Astudiaeth ond sydd heb y cymwysterau academaidd gofynnol ddangos tystiolaeth o’u gwybodaeth gerddorol gyffredinol a galluoedd academaidd. Bydd manylion y dystiolaeth sydd ei hangen yn cael eu nodi gan y Coleg ar sail unigol a bydd fel arfer yn cynnwys cyfuniad o’r canlynol:

• Tystiolaeth o ddawn gerddorol a sgiliau a gwybodaeth am theori cerddoriaeth sy’n gydnaws â mynediad i’r Rhaglen BMus (e.e. tystysgrifau arholiad theori cerddoriaeth neu wedi cwblhau cwrs cychwynnol Harmoni a Theori ar-lein y Coleg)
• Sampl o waith ysgrifenedig (e.e. traethawd, darn o ysgrifennu creadigol, neu blog)
• Sampl o waith nodiant (e.e. cyfansoddiad neu drawsgrifiad)
• Tystiolaeth o brofiadau artistig neu gerddorol blaenorol (e.e. rhaglenni cyngerdd, recordiadau sain neu fideo, beirniadaeth cystadleuaeth)