Trosolwg o’r Cwrs

Mae profiad ymarferol a lleoliadau gwaith gyda rhai o enwau mwyaf y diwydiant yn rhan ganolog o’ch hyfforddiant.  

Gyda’n hyfforddiant arbenigol ym maes cynllunio setiau a gwisgoedd, byddwch yn dysgu’r holl sgiliau ymarferol a phroffesiynol sydd eu hangen arnoch i gael gyrfa yn gweithio ym maes digwyddiadau, teledu, theatr neu ffilm.  

Mae’n dechrau gyda chyflwyniad i ddulliau a thechnegau cynllunio – fel lluniadu technegol, defnyddio meddalwedd cynllunio, creu gwisgoedd a gwneud propiau. Bydd cyfres o brosiectau astudio cysyniadol ac arbenigol wedyn yn eich galluogi i ddefnyddio eich sgiliau ac archwilio eich hunaniaeth artistig heb gyfyngiadau ymarferol. 

Dan arweiniad eich tiwtoriaid, byddwch yn nodi cryfderau a diddordebau penodol i’w datblygu drwy ddosbarthiadau sgiliau uwch a gwaith seiliedig ar berfformio.  

Fel myfyriwr yma, byddwch yn ymgolli yn yr awyrgylch creadigol sy’n nodweddiadol o’n hamgylchedd dysgu conservatoire. Byddwch yn gweithio ochr yn ochr â myfyrwyr cerddoriaeth a drama mewn rhai o bron i’r 30 digwyddiad a gynhelir yn y Coleg bob blwyddyn.  

Byddwch hefyd yn cael lleoliadau gwaith gyda’n sefydliadau partner, sy’n rhai o’r enwau mwyaf eu bri yn y diwydiant, gan gynnwys y BBC, Badwolf Studios, Cos Props, y Tŷ Opera Brenhinol a’r National Theatre.  

Daw eich cwrs i ben gyda myfyrwyr yn trefnu i arddangos gwaith ymarferol a gwaith prosiect pawb; gwaith sydd wedi’i gasglu a’i fireinio dros y tair blynedd. Bydd hwn yn cael ei arddangos yng Nghaerdydd ac ar South Bank yn Llundain, lle ceir ymweliadau gan ddarpar gyflogwyr o stiwdios a theatrau mawr. 

Pam astudio’r cwrs hwn?  

• Byddwch yn cael dealltwriaeth ddofn o theori ac ymarfer cynllunio sy’n gysylltiedig â pherfformio er mwyn eich paratoi ar gyfer gyrfa mewn theatr, ffilm neu deledu. Mae’n cynnwys amrywiaeth eang o sgiliau ymarferol, gan gynnwys lluniadu technegol, CAD, SketchUp, gwneud modelau, torri patrymau, creu gwisgoedd, gwneud hetiau, teilwriaeth, celf golygfeydd a gwneud propiau.  

• Mae ein rhestr drawiadol o diwtoriaid yn cynnwys ymarferwyr ac artistiaid creadigol o amrywiaeth o ddisgyblaethau – sy’n cynnig mentoriaeth a chyfleoedd rhwydweithio yn ogystal ag addysg o’r radd flaenaf i chi. 

• Rydym wedi ffurfio partneriaethau cryf â rhai o enwau mwyaf y diwydiant, fel y BBC, Badwolf Studios, Cos Props, y Tŷ Opera Brenhinol a’r National Theatre, a byddwch yn cael cyfleoedd i gymryd rhan mewn lleoliadau gwaith gyda nhw yn ystod eich cyfnod yma. 

• Gallwch deilwra eich astudiaeth i gyd-fynd â’ch diddordebau a’ch uchelgais o ran gyrfa – a does dim rhaid i chi benderfynu ar arbenigedd tan eich blwyddyn olaf.  

• Mae ein dosbarthiadau yn fach, felly byddwch yn cael llawer o gefnogaeth unigol gan eich tiwtoriaid.  

• Mae profiad ymarferol yn hanfodol i’r hyfforddiant. O’r wythnos gyntaf ymlaen, byddwch yn dechrau datblygu prosiectau ymarferol, gan ganolbwyntio ar wisgoedd, propiau a phypedwaith cydweithredol. Yn nes ymlaen yn eich blwyddyn gyntaf, byddwch yn gweithio’n unigol ac fel rhan o dîm i greu digwyddiad ‘gwisg fel perfformiad’ ar y cyd â myfyrwyr rheoli llwyfan. 

• Fel rhan o’ch cwrs, byddwch hefyd yn cynllunio set a gwisgoedd ar gyfer testun clasurol mewn theatr draddodiadol, gan weithio gyda thiwtor yn rôl cyfarwyddwr, gyda staff ychwanegol yn rhoi arweiniad ymarferol.  

• Byddwch hefyd yn archwilio technegau pypedwaith, gan eich paratoi ar gyfer lleoliadau posibl mewn cynyrchiadau mawr sy’n benodol i safle a gynhelir bob haf gan yr adran Cynllunio ar gyfer Perfformio. 

• Bob blwyddyn, mae’r Coleg yn cynhyrchu mwy na 26 o gynyrchiadau theatr gan gynnwys theatr gerdd ac opera. Yn eich ail flwyddyn, gallwch weithio ar y cynyrchiadau hyn mewn rolau fel cynorthwyydd cynllunio, artist golygfeydd, gwneuthurwr propiau, goruchwyliwr neu wneuthurwr gwisgoedd, yn dibynnu ar eich maes arbenigedd. Yn ystod eich blwyddyn olaf, mae rolau posibl yn cynnwys rôl uwch neu gynllunydd yn y tîm gwireddu.  

• Bob blwyddyn, mae rhwng 20 a 30 o ymarferwyr blaenllaw yn ymweld â’r Coleg i gynnal dosbarthiadau meistr gyda’n myfyrwyr, gan roi cipolwg heb ei ail i chi ar y diwydiant.  

• Byddwch yn datblygu eich sgiliau ymchwil drwy ddarlithoedd, seminarau a theithiau maes gan ganolbwyntio ar ddatblygiadau pwysig yn hanes theatr, celf, pensaernïaeth, cynllunio a gwisgoedd. 

• Yn ogystal â’ch hyfforddiant ymarferol, byddwch hefyd yn dysgu sut mae creu eich gwefan broffesiynol eich hun – sy’n hanfodol i gynllunwyr sy’n gweithio yn y diwydiant heddiw. 

Gofynion Mynediad

Fel arfer, yr isafswm o ran cymwysterau ar gyfer mynediad yw lefel A neu gymhwyster cyfatebol mewn celf a dylunio. Mae cymwysterau cyfatebol yn cynnwys WBQ, Scottish Highers, Diploma/Tystysgrif Genedlaethol BTEC, Bagloriaeth Ryngwladol, GNVQ Uwch, AVCE neu Ddiploma Uwch (Lefel 3), neu gymwysterau rhyngwladol cydnabyddedig. 

Fodd bynnag, bydd unrhyw amodau gofynnol a gynhwysir gyda chynnig lle wedi'u seilio ar geisiadau unigol, cyfweliadau a chyflwyniadau portffolio. Efallai y bydd y Coleg yn ystyried ceisiadau gan bobl sydd heb gymwysterau ffurfiol os oes ganddynt lefel eithriadol o allu ymarferol a phortffolio addas. 

Rydym yn argymell bod ymgeiswyr yn cwblhau Cwrs Sylfaen Celf a Dylunio cyn cael mynediad. 

Ymgeiswyr Rhyngwladol

Bydd angen i ymgeiswyr rhyngwladol nad Saesneg yw eu hiaith gyntaf ddangos bod eu gallu Saesneg yn cwrdd â gofynion sylfaenol y Coleg. Cyfeiriwch at ein tudalen Gofynion Iaith Saesneg i gael manylion profion iaith Saesneg derbyniol a’r sgorau gofynnol.

Ffioedd Dysgu ar gyfer 2023-2024 (2024-2025 TBC)

* Gosodir ffioedd dysgu israddedig ar gyfer myfyrwyr o’r Deyrnas Unedig gan Lywodraeth Cymru. Cânt eu hadolygu’n flynyddol a gallent godi yn y dyfodol.

** Mae ffioedd dysgu israddedig ar gyfer myfyrwyr tramor yn amodol ar gynnydd blynyddol.

Gwybodaeth bellach am y cyllid sydd ar gael tuag at gost ffioedd dysgu.

Arolwg Cenedlaethol Myfyrwyr 2021: Cynllunio Ar Gyfer Perfformio CBCDC

• Yr addysgu ar fy nghwrs: 100%
• Cyfleoedd dysgu: 100%
• Asesu ac adborth: 95.83%
• Cymorth academaidd: 98.15%
• Trefniadaeth a rheolaeth: 96.30%
• Adnoddau dysgu: 92.59%
• Cymuned ddysgu: 97.22
• Llais y Myfyrwyr: 92.59
• Boddhad cyffredinol: 100